Solapur News : यंदाच्या गाळप हंगामात सोलापूर जिल्ह्यातील ३४ पैकी १७ साखर कारखाने एक डिसेंबरअखेर चालू झाले आहेत. त्यामध्ये आतापर्यंत १० लाख ३५ हजार ३४० मेट्रिक टन उसाचे गाळप झाले असून, ७.०९ टक्के सरासरी साखर उताऱ्याने सात लाख ३४ हजार ९० क्विंटल साखर उत्पादन झाले आहे.

सोलापूर जिल्ह्यात पाच सहकारी व १२ खासगी कारखाने सुरू झाले आहेत. सहकारी कारखान्यात चार लाख ६१ हजार २८१ मेट्रिक टन उसाचे गाळप झाले असून, तीन लाख ६२ हजार ५०९ क्विंटल साखरनिर्मिती झाली आहे.

खासगी कारखान्यांनी पाच लाख ७४ हजार ५९ मेट्रिक टन उसाचे गाळप करत तीन लाख ७१ हजार ५९० क्विंटल साखर उत्पादन घेतले आहे.

जिल्ह्यातील सहकारी कारखान्यांचा सरासरी साखर उतारा ७.३३, तर खासगी कारखान्यांचा उतारा ६.४७ टक्के आहे. जिल्ह्यात सहकार महर्षी कारखाना गाळप व साखर उत्पादनात सध्यातरी आघाडीवर आहे. पांडुरंग कारखाना दुसऱ्या क्रमांकावर आहे.