पुणे ः पुणे बाजार समितीमध्ये (Pune APMC) कोकण हापूस (Kokan Alphonso) म्हणून कर्नाटकचा आंबा (Karnatak Mango) विक्री करीत शेतकरी आणि ग्राहकांच्या फसवणुकीचे वृत्त दै. ‘ॲग्रोवन’मध्ये प्रसिद्ध झाल्यानंतर झोपेतून जागे झालेल्या बाजार समिती कर्मचाऱ्यांनी कोकणातील शेतकऱ्यांचा हापूस आंबा कर्नाटक म्हणून जप्त केल्याची कामगिरी केली आहे. या प्रकारात शेतकऱ्याला वेठीस धरत नाहक मनस्तापाला सामोरे जावे लागले. तर या प्रकारात शेतकऱ्याच्या दोन आंब्याच्या पेट्या चोरीस गेल्याचे समोर आले आहे.

पुणे बाजार समितीमध्ये सोमवारी (ता. २५) शेतकरी महादेव लक्ष्मण काळे (Laxman Kale Farmer) (रा. दापोली) यांनी त्यांच्या शेतातील हापूस आंब्याच्या शंभर पेट्या विक्रीसाठी आणल्या होत्या. परंतु हा आंबा कर्नाटक आंबा असल्याचे म्हणत बाजार समितीच्या गट प्रमुखाने शेतकऱ्यांच्या पेट्या ताब्यात घेतल्या. शेतकऱ्याने (Mango Farmer) सातत्याने विनवणी करूनही त्यास प्रतिसाद न देता उलट शेतकऱ्यालाच दमदाटी करत पेट्या सुरक्षारक्षकाच्या केबिनमध्ये आणण्यात आल्या. हा आंबा कर्नाटकचा आहे की रत्नागिरी हापूस, याची तपासणी करण्यासाठी गटप्रमुखाने परप्रांतीय विक्रेत्याला बोलावत, आम्हाला वेठीस धरल्याचे काळे यांनी सांगितले.

शेतकरी महादेव काळे म्हणाले, ‘‘दापोलीवरून येताना मी हापूसच्या शंभर पेट्या आणल्या होत्या. हा आंबा रत्नागिरीचा नसून कर्नाटकचा असल्याचे सांगत बाजार समितीच्या कर्मचाऱ्यांनी जप्त करण्याची प्रक्रिया सुरू केली. यामध्ये दोन पेट्या चोरीला गेल्या आहेत. ९८ पेट्या शिल्लक आहेत. समितीचे लोक म्हणतात गाडी बाहेर लावायची. बाहेर गाडी लावली की बाहेरची लोक त्रास देतात. आत गाडी लावली की पार्किंगवाले त्रास देतात.’’ अशी उद्विग्न प्रतिक्रिया शेतकऱ्याने दिली.