Pune ZP News जिल्हा परिषदेत रिक्त असलेल्या तब्बल १८ हजार ९३९ रिक्त पदांच्या भरतीसाठी (Pune ZP Recruitment) २०१९ मध्ये राज्य सरकारने जाहिरात काढली. मात्र, कोरोनाच्या साथीत ही भरती प्रक्रिया मागे पडली.

आता स्वातंत्र्याच्या अमृत महोत्सवी वर्षानिमित्त राज्य सरकारने ७५ हजारांच्या भरतीचा गाजावाजा केला. मात्र, वास्तवात चार वर्षांनंतरही जिल्हा परिषदेची रखडलेली भरती नक्की होणार की नाही, याबद्दल उमेदवार संभ्रमात आहेत.

सरकारच्या आश्वासनांबरोबरच सरकारी अध्यादेशांवरचाही विश्वास उडत चालल्याची संतप्त भावना उमेदवारांनी व्यक्त केली आहे. लवकरच सरळसेवा भरती प्रक्रिया पार पडेल, असे मागील चार वर्षांपासून उमेदवारांना सांगितले जाते. परंतु याबाबतची ठोस माहिती मिळत नसल्याने, यावेळीही विद्यार्थ्यांचा अपेक्षा भंग होणार आहे का? असा प्रश्न उपस्थित केला जात आहे.

जिल्हा परिषदेतील रिक्त जागांसह तलाठी, वनरक्षक, नगरपरिषदेमध्ये रिक्त पदांची भरती प्रक्रिया रखडली आहे. शासनाने जिल्हा परिषदेच्या भरतीसाठीसंभाव्य वेळापत्रकही घोषित केले होते.

मात्र, त्यातील एकही वेळ पाळली गेली नसल्याचे आता सिद्ध झाले आहे. शासनाने भरती होणार की नाही, याबाबत स्पष्ट सांगावे, विनाकारण अधांतरी ठेवून विद्यार्थ्यांचा पैसा व वेळ वाया घालवू नये, अशा संतप्त प्रतिक्रिया उमेदवारांनी व्यक्त केल्या.

सद्यःस्थिती काय?

भरतीची जाहिरात नक्की केव्हा येणार, याबद्दल उमेदवार अनभिज्ञ पोलिस शिपाई भरती वर्ग ‘क’ आणि ‘ड’ सोडता इतर कोणत्याही पदांच्या जाहिराती आलेल्या नाहीत.

जानेवारी महिन्याच्या सुरुवातीलाच सर्व प्रक्रिया सुरू होणे अपेक्षित होते; मात्र अद्यापही कोणतेच अपडेट नाही.

ग्रामविकास विभागाचे २०१९ मधील परिक्षा शुल्काचा प्रश्न अनिर्णित.

आश्वासने...

पुढील काही दिवसांत जाहिरात प्रसिद्ध होईल.

दहा ते पंधरा दिवसांत जाहिरात प्रसिद्ध होणार आहे.

विद्यार्थ्यांना लवकरच ऑनलाइन अर्ज भरण्याची संधी उपलब्ध करून दिली जाईल.

जाहिरात प्रसिद्ध करण्याचे काम अंतिम टप्प्यात आले आहे.