कोल्हापूर : शिरोळ तालुक्यात आगाप लागवड (Soybean Cultivation) केलेल्या सोयाबीनवर पिवळ्या मोझॅक रोगाचा (Yellow Mosaic On Soybean) प्रादुर्भाव झाला आहे. दानोळी कवठेसार परिसरातील एकूण सोयाबीन क्षेत्राच्या (Area Of Soybean) पन्नास टक्के क्षेत्रावर या रोगाचा हल्ला झाला आहे.

शेतकऱ्यांनी रोगनियंत्रण करण्यासाठी त्याच्यावर औषधाची फवारणी केली आहे. तरीही आवश्यक तेवढा सकारात्मक परिणाम होताना दिसत नाही. याची पाहणी करण्यासाठी कृषी शास्त्रज्ञ डॉ. अशोक पिसाळ, डॉ. रवी कारंडे, उपविभागीय कृषी अधिकारी मकरंद कुलकर्णी, तालुका कृषी अधिकारी गणेश भोसले, कृषी पर्यवेक्षक संपतराव मुळीक, कृषी सहायक ज्योती भाटे यांनी भेट देऊन उपाययोजना सांगितल्या.

रस शोषणाऱ्या किडीचा बंदोबस्त करावा. त्यासाठी कीटकनाशकाचा उलटा नोझल वापरून पानाखालून फवारणी, शेतात पिवळ्या चिकट सापळ्यांचा वापर, नत्रयुक्त खतांचा संतुलित प्रमाणात वापर, आर्द्रता वाढल्यास बुरशीजन्य रोगाच्या नियंत्रणासाठी बरशानाशकची फवारणी असा उपायोजना शेतकऱ्यांना सांगितल्या. त्यांनी दानोळी, कवठेसार व शिरोळ तालुक्यातील काही गावांना भेटी दिल्या.