Sangli News : जिल्ह्यात चारा टंचाईची तीव्रता वाढू लागली आहे. त्यामुळे पशुसंवर्धन विभागाकडून शेतकऱ्यांना चारा बियाणे शंभर टक्के अनुदानावर वाटप केले जाते. लवकरात लवकर चारा बियाणे वाटप करा असे आदेश आयुक्तांनी दिले आहेत.

परंतु एका महिन्यापेक्षा अधिक काळ लोटला असला तरी अद्यापही पशुसंवर्धन विभागाने चारा बियाणे वाटप करण्यासाठी कोणत्याही हाचलाची केल्या नसल्याचे चित्र आहे. त्यामुळे चारा बियाणे कधी मिळणार असा प्रश्न पशुपालक उपस्थित करु लागले आहेत.

जिल्ह्यात यंदा पावसाने दडी मारली आहे. त्यामुळे दिवसेंदिवस चारा टंचाईची भीषणता वाढू लागली आहे. जिल्हा नियोजन समितीच्या बैठकीत यंदा चारा बियाणांसाठी एक कोटींच्या निधीची उपलब्धता केली आहे. ३० लाख रुपयांचे बियाणे देण्यासाठी पशुसंवर्धन विभागाने पुढाकार घेतला आहे.

जिल्ह्यातील प्रत्येक तालुक्यातील संबंधित विभागाला अर्ज मागवण्यासाठी उद्दिष्ट दिले आहे. त्यानुसार संबंधित विभागाकडून शेतकऱ्यांची चारा बियाणे मागणी अर्ज घेत आहेत. त्यानुसार प्रत्येक तालुक्यातून चारा बियाणांसाठी मागणी आली आहे. जितक्या चारा बियाणांची मागणी आहे, तेवढी मागणी केली जाणार आहे. एका लाभार्थाला १५०० रुपये बियाणे देण्याचे नियोजन केले आहे.

शेतकऱ्यांनी चारा बियाणे मागणी केली आहे याची तालुकानिहाय याद्या वरिष्ठ कार्यालयाकडे प्राप्त होतात. त्यानंतर ड्रॉपध्दतीने शेतकऱ्यांनी निवड केली जाते, आणि शेतकऱ्यांना चारा बियाणे दिले जाते. मात्र, आयुक्त कार्यालयाने तातडीने चारा बियाणे वाटप करा असे आदेश दिले आहेत. परंतु जिल्हा पशुसंवर्धन विभागाने त्याकडे दुर्लक्ष केले असल्याचे चित्र आहे. त्यामुळे चारा बियाणे कधी मिळणार असा प्रश्न पशुपालक उपस्थित करु लागले आहेत.

 निधीत केली वाढ

दरवर्षी जिल्हा नियोजन समितीच्या बैठकीत चारा बियाणेसाठी २५ लाखाच्या निधीची तरतूद केली जाते. तालुक्यातून किती शेतकरी चारा बियाण्यांची मागणी केली जाते, त्यानुसार बियाणे दिले जाते. परंतु यंदा दुष्काळी परिस्थिती असल्याने सर्वच तालुक्यात चारा टंचाई भासणार असल्याने चारा बियाणांच्या निधीत ७५ लाखांनी वाढ केली आहे. अर्थात यंदा बियाणांसाठी १ कोटी निधीची तरतूद केली आहे.