Mokhada News : प्रतिवर्षी मोखाड्यात फेब्रुवारी महिन्यात पाणीटंचाईला (Water Shortage) सुरुवात होते; मात्र यावर्षी दीड महिना अगोदरच जानेवारी महिन्याच्या पहिल्याच आठवड्यात पाणीटंचाईला (Water Scarity) सुरुवात झाली आहे.

१० जानेवारीला मोखाड्यात पहिला टॅंकर पाणीपुरवठ्यासाठी (Tanker Water) दाखल झाला आहे. सद्यस्थितीत तीन टॅंकरद्वारे सहा गावपाड्यांना पाणीपुरवठा (Water Supply) सुरू केला आहे.

मागील वर्षीच्या तुलनेने या वर्षी उन्हाची तीव्रता वाढू लागल्याने दिवसागणिक टंचाईग्रस्त गाव-पाड्यांची संख्या वाढणार असल्याचे नागरिकांतून बोलले जात आहे.

दर वर्षी मोखाड्यात फेब्रुवारी महिन्यात पाणीटंचाईला सुरुवात होते. गेल्या वर्षी २४ फेब्रुवारीला पहिला टॅंकर पाणीपुरवठ्यासाठी मोखाड्यात दाखल झाला होता. या वर्षी दीड महिना अगोदरच म्हणजे १० जानेवारीला शासनाला टॅंकरद्वारे पाणीपुरवठा सुरू करावा लागला आहे.

मोखाड्यातील अतिदुर्गम पाणीटंचाईला संवेदनशील असलेल्या दापटी एक आणि दापटी दोन या दोन गावपाड्यांना पहिल्या टॅंकरद्वारे पाणीपुरवठा सुरू करण्यात आला आहे. त्यानंतर टंचाईग्रस्त गाव पाड्यांमध्ये वाढ झाली.

त्यामध्ये हेदवाडी, ठवळपाडा, हट्टीपाडा, स्वामीनगर या गावपाड्यांनी टॅंकरद्वारे पाणीपुरवठ्याची मागणी केली होती. त्यामुळे आता तालुक्यात एकूण सहा टंचाईग्रस्त गाव पाड्यांना आता तीन टॅंकरने पाणीपुरवठा सुरू करण्यात आला आहे

अन्य पाड्यांत टॅंकर मंजुरीसाठी प्रस्ताव

गेल्या वर्षीच्या तुलनेने या वर्षी उन्हाची तीव्रता जास्त असणार असल्याचा प्राथमिक अंदाज हवामान खात्याने वर्तवला आहे. दिवसागणिक उन्हाची तीव्रता वाढू लागल्याने मोखाड्यात ही टंचाईग्रस्त गाव पाड्यांची संख्या वाढत आहे.

तालुक्यातील मडक्याची मेट, गवरचरीपाडा, भोवाडी या गावपाड्यांतील विहिरींनी तळ गाठल्याने, तेथील नागरिकांना पाणीटंचाई जाणवू लागली आहे. त्यांनी टॅंकरद्वारे पाणीपुरवठ्याची मागणी मागणी पाणीपुरवठा विभागाकडे केली आहे. त्यामुळे मोखाडा तालुक्यात टॅंकरद्वारे पाणीपुरवठा करण्याचा प्रस्ताव मंजुरीसाठी जिल्हाधिकारी कार्यालयाला पाठवल्याची माहिती तालुका पंचायत समिती प्रशासनाने दिली आहे.