Vasi News : नैसर्गिक आपत्ती, वाढलेले मजुरीचे दर, महागलेले बियाणे, खते आणि वाढते इंधनाचे दर यामुळे शेतकरी आर्थिक संकटात सापडला आहे. पालघर जिल्ह्यात ७६ हजार हेक्टरवर भातशेती केली जाते. मात्र, भरमसाट वाढलेला उत्पादन खर्चही वसूल होत नसल्यामुळे शेतकऱ्यांसमोर मोठा प्रश्न निर्माण होत आहे.

पालघर जिल्ह्यात वसई, पालघर, विक्रमगड, डहाणू, जव्हार, मोखाडा, वाडा, तलासरी भागांत हजारो हेक्टर क्षेत्र भातशेती लागवडीखाली आहे. काही वर्षांपासून शेती व बागायतीवर नैसर्गिक संकट घोंगावत आहे.

गतवर्षी अवकाळी पावसामुळे पाच तालुक्यांत ५,२८६.५८ हेक्टर शेतजमीन बाधित झाली होती. त्यामुळे शेतकऱ्यांचे कोट्यवधींचे नुकसान झाले होते. यंदा पावसाची जूनच्या शेवटच्या आठवड्यापर्यंत वाट पाहावी लागली. त्यामुळे अनेक भागांत उशिराने पेरणी करण्यात आली.

खते

युरिया २७० रुपये (४५ किलो)

सुफला १४७० (५० किलो)

मजुरी ४०० ते ५००

टॅक्टर तासाला ६०० रुपये

बियाणे

वायएसआर १० किलो ८५०

रुपाली १२ किलो १०२०

मजुरांची कमतरता, ट्रॅक्टरही महागला

भातशेतीसाठी लागणाऱ्या मजुरांचीही कमतरता भासत आहे. त्यामुळे मजुरीचे दरही गगनाला भिडले आहेत. रोज ४०० ते ५०० रुपये मजुरी, जेवण व दोन वेळा चहा असा खर्च शेतकऱ्यांना सोसावा लागत आहे; तर ट्रॅक्टरसाठी गेल्या वर्षीच्या ५०० रुपयांच्या तुलनेत प्रतितास १०० रुपये अधिक मोजावे लागत आहेत. त्यामुळे शेतकऱ्यांवर आर्थिक बोजा वाढला आहे.