Panganga Water Project Nanded : नांदेडसह यवतमाळ जिल्ह्यातील गावांना पिण्याचे पाणी, सिंचनासाठी (Agriculture Irrigation) लाभदायक ठरणाऱ्या पैनगंगा नदीवरील सात उच्चपातळी बंधाऱ्यांचा ऊर्ध्व पैनगंगा प्रकल्पात (Painganga Water Project) समावेश करण्यात आला आहे.

खासदार हेमंत पाटील यांनी याबाबत सातत्याने पाठपुरावा केला होता. यामध्ये किनवट, माहूर, हदगाव आणि हिमायतनगर तालुक्यातील गावांचा समावेश आहे. या सात उच्चपातळी बंधाऱ्यांना मान्यता मिळाल्यामुळे मराठवाडा, विदर्भातील शेतकरी, जनतेत समाधान आहे.

पैनगंगा नदीवर सात उच्चपातळीचे बंधारे मंजूर करण्यात यावेत, यासाठी खासदार पाटील हे मागील दोन वर्षांपासून पाठपुरावा करत होते. काही दिवसांपूर्वीच मुख्यमंत्री एकनाथ शिंदे यांच्या अध्यक्षतेखाली वर्षा निवासस्थानी बैठक झाली.

या बैठकीत मुख्यमंत्र्यांनी या सात बंधाऱ्यांना तत्काळ मंजुरी देऊन एक महिन्यात राज्यस्तरीय तांत्रिक सल्लागार समितीकडून मान्यता देण्याचे निर्देश संबंधित विभागाला दिले होते. त्यावर अवघ्या २० दिवसांत कार्यवाही करत जलसंपदा विभागाने यास मान्यता दिली आहे.

नांदेड, हिंगोली, यवतमाळ जिल्ह्यांसाठी वरदान ठरणाऱ्या या प्रकल्पामुळे नांदेड जिल्ह्यातील हदगाव, हिमायतनगर, किनवट आणि माहूर हे तालुके सुजलाम सुफलाम होणार आहेत. सोबतच हिंगोली जिल्ह्यातील कळमनुरी, या भागासह विदर्भातील पुसद, उमरखेड, महागाव या तालुक्यांना सुद्धा लाभ होणार आहे.

यामध्ये हदगाव तालुक्यातील पांगरा, बनचिंचोली, गोजेगाव, हिमायतनगर तालुक्यातील घारापूर, किनवट तालुक्यातील किनवट आणि मारेगाव तर माहूर तालुक्यातील धनोडा या सात गावांचा समावेश आहे.

लवकरच या कामाला सुरुवात होणार आहे. या प्रकल्पाला अंदाजित एक हजार सहाशे कोटी रुपये खर्च होणार असून प्रती वर्षी पाचशे कोटी रुपये देण्यात येणार आहेत.