अकोला ः हवामान विभागाने (Weather Department) दिलेला अवकाळी पावसाचा (Unseasonal Rain) इशारा खरा ठरला. बुधवारी (ता.१४) रात्री अकोला, बुलडाणा जिल्ह्यात काही ठिकाणी अवकाळी पावसाच्या हलक्या ते मध्यम सरी कोसळल्या. प्रामुख्याने अकोला, बुलडाणा, चिखली, मलकापूर, साखरखेर्डा या भागात पावसाने हजेरी लावली.

या अवकाळी पावसाचा गहू आणि हरभरा या पिकांना काहीसा फायदा होईल. तर तुरीच्या पिकावर किड-रोगांचा प्रादुर्भाव वाढून उत्पादनाला फटका बसण्याची शक्यता आहे. तुरीच्या शेंगामध्ये अळीचा हल्ला वाढू शकतो. तर घाटे अवस्थेत असलेल्या हरभरा पिकालाही या वातावरणामुळे नुकसान संभव्यते.

अकोल्यात रात्री सरी आल्याने थंडी पूर्णतः गायब झाली. खामगाव तालुक्यात बुधवारी सायंकाळी ५ वाजेच्या दरम्यान जवळपास १ ते दीड तास रिमझिम पाऊस झाला. त्यामुळे जनजीवन विस्कळित झाले होते. काळेगाव भागात जोरदार पावसाने नाल्याला पूरही आला. मलकापूर तालुक्यातही हलक्या स्वरूपात पावसाची नोंद झाली. अचानक आलेल्या पावसामुळे मलकापुरातील बाजारपेठेत चांगलीच धांदल उडाली होती.

सर्दी, खोकल्याचे रुग्ण वाढले

गेल्या आठवडाभरापासून या भागात वातावरणात बदल झाले आहे. थंडीचे प्रमाण कमी झाले. सतत ढगाळ वातावरण बनलेले राहते. यामुळे सर्दी, खोकला, ताप असे आजार बळावत चालले आहेत.