Solapur News : पावसाळा सुरू असतानाही ऑगस्टमध्ये सरासरीच्या १५ टक्केसुद्धा पाऊस पडलेला नाही. जिल्ह्यात ऊस वगळता तीन लाख २५ हजार हेक्टरवर खरिपाची पेरणी झाली आहे. त्यात तूर, मूग, उडीद, मका, सोयाबीन, सूर्यफूल व भुईमुगाचा समावेश आहे. दुसरीकडे शेतकऱ्यांनी कांदा लागवडीची तयारी केली आहे, पण रोपांनाही पाण्याची ओढ बसत आहे.

यंदा अपेक्षित पाऊस न झाल्याने जमिनीची पाणीपातळी देखील वाढलेली नाही. जिल्ह्याची वरदायिनी उजनी अजून समाधानकारक स्थितीत नाही. तसेच जिल्ह्यातील सात मध्यम प्रकल्पांनी देखील तळ गाठला आहे. पाऊस न पडल्यास पावसाळ्यात दुष्काळी स्थिती निर्माण होईल, अशी भीती वर्तविली जात आहे.

तीन लाख हेक्टरवरील पिकांना पाण्याची ओढ

जिल्ह्यातील अक्कलकोट, दक्षिण सोलापूर, बार्शी, सांगोला, मंगळवेढा, मोहोळ, उत्तर सोलापूर यासह इतर तालुक्यांमध्ये यंदा तीन लाख २५ हजार १८३ हेक्टरवर खरिपाची पेरणी झाली आहे. त्यातील तीन लाख हेक्टर क्षेत्र कोरडवाहू (हंगामी बागायत) आहे.

आमदार गप्प अन्‌ प्रशासनाचा निर्णय होईना

प्रत्येक तालुक्यांच्या लोकप्रतिनिधींनी त्यांच्या मतदारसंघातील शेतकऱ्यांची चिंता पाहून खरीप पिकांना उजनीतून एक आवर्तन सोडण्याची मागणी करणे अपेक्षित आहे. पण, बहुतेक आमदारांनी अद्याप लाभक्षेत्र विकास प्राधिकरणाकडे तशी मागणी केलेली नाही.