अंबाजोगाई, जि. बीड : तालुक्यात गोगलगायीच्या (Snail) प्रादुर्भावाने झालेल्या नुकसानीचा प्रश्‍न विधानसभेत मांडणार असून, नुकसानभरपाई देण्यास आपण सरकारला भाग पाडू, असे आश्‍वासन विरोधी पक्षनेते अजित पवार (Ajit Pawar) यांनी जवळगाव (ता. अंबाजोगाई) येथील शेतकऱ्यांना रविवारी (ता. ३१) येथे दिले.

पवार यांनी जवळगाव येथे गोगलगायीच्या प्रादुर्भावाने नुकसान झालेल्या क्षेत्रास भेट देऊन, शेतकऱ्यांशी चर्चा केली. त्या प्रसंगी त्यांनी हे आश्वासन दिले. यावेळी माजी पालकमंत्री धनंजय मुंडे (Dhananjay Munde) , आमदार संजय दौंड (Sanajy Daund) , जिल्हाध्यक्ष राजेश्वर चव्हाण यांच्यासह राष्ट्रवादी काँग्रेसचे पदाधिकारी, महसूल व कृषी अधिकारी यांची उपस्थिती होती.

गोगलगायींच्या (Snail Attack) प्रादुर्भावाने ३६०० हेक्टर क्षेत्रात नुकसान झालेला हा एकमेव भाग आहे. यामुळे शेतकऱ्यांना दुबार व तिबार पेरणी करण्याची वेळ शेतकऱ्यांवर आली. याची माहिती मिळताच विरोधीपक्ष नेते अजित पवार (Ajit Pawar) यांनी प्रत्यक्ष भेट देऊन शेतकऱ्यांशी चर्चा केली. या वेळी शेतकऱ्यांनाही आपल्या व्यथा मांडल्या.

कृषी अधिकारी व शेतकऱ्यांनी दिलेल्या माहिती नंतर श्री. पवार यांनी या नुकसानीचे सरकारने तत्काळ पंचनाम्याचे आदेश देऊन शेतकऱ्यांना मदत केली पाहिजे. या नुकसानीबाबत पीकविम्यातही (Crop Insurance) अंतर्भाव नाही. त्याबाबत आपण विमा कंपन्यांशी चर्चा करू. मुंबईत गेल्यानंतर उच्च स्तरीय अधिकाऱ्यांशी चर्चा करणार असल्याचे त्यांनी सांगितले. याची नुकसानभरपाई देण्यासाठी आपण सरकारला भाग पाडू, असे आश्‍वासनही त्यांनी शेतकऱ्यांना दिले.