Pandharpur News ः संत निळोबा महाराज सेवा मंडळ त्यागमूर्ती बबन महाराज भक्त सदन, पंढरपूर येथील १३७ वारकरी भाविकांना अन्नातून विषबाधा झाल्याने त्यांना तत्काळ उपजिल्हा रुग्णालय पंढरपूर येथे उपचारासाठी दाखल करण्यात आले. सध्या सर्व भाविकांची प्रकृती स्थिर असल्याचे सांगण्यात आले.

माघी एकादशी निमित्त पंढरपूर (Maghi Vari) येथील सदर मठात नांदेड, हिंगोली, यवतमाळ जिल्ह्यांतून वारकरी भाविक आले होते. बुधवारी रात्री आठ ते नऊ या कालावधीत एकादशी फराळाच्या जेवणात भगर, आमटी व पाणी हे पदार्थ खाल्याने १३७ भाविकांना अन्नातून बाधा झाली.

त्यांना उलटी, मळमळ, पोटदुखी, चक्कर आदी लक्षणे जाणवल्याने तत्काळ उपजिल्हा रुग्णालयात दाखल करण्यात आले. उपचार घेत असलेल्या भाविकांची प्रांताधिकारी गजानन गुरव यांनी भेट घेऊन प्रकृतीची विचारपूस केली.

या वेळी त्यांच्या समवेत तहसीलदार सुशिल बेल्हेकर, गटविकास अधिकारी प्रशांत काळे, मुख्याधिकारी अरविंद माळी, अन्न व औषध प्रशासन सहायक आयुक्त सुनील जिंतूरकर, जिल्हा आरोग्य अधिकारी डॉ. बागडे, जिल्हा शल्यचिकित्सक डॉ. धनंजय पाटील, उपजिल्हा रुग्णालयाचे वैद्यकीय अधीक्षक डॉ. महेश माने, तालुका आरोग्य अधिकारी डॉ. एकनाथ बोधले उपस्थित होते.