बुलढाणा : शेतकऱ्यांना जाहीर झालेली मदत मिळाली नाही, शेतीसाठी दिवसा वीज दिली जात नाही, वन्यजीवांच्या ( Wildlife Animal) त्रासामुळे शेतकरी अडचणीत आहे.

अशा विविध मागण्यांवरून स्वाभिमानी शेतकरी संघटनेच्या (Swabhimani Shetkari Sanghatana) कार्यकर्त्यांनी देऊळगावराजा तालुका कृषी अधिकारी कार्यालयात आंदोलन केले. आंदोलकांनी (Protest) कीटकनाशकाच्या बाटल्या आणल्याने खळबळ उडाली होती.

स्वाभिमानी शेतकरी संघटनेच्या कार्यकर्त्यांनी स्वतःला कृषी अधिकाऱ्यांच्या कार्यालयात कोंडून घेत आंदोलन केले होते. यावेळी पोलिस प्रशासनाची तारांबळ उडाली.

शेतकरी सध्या अनेक अडचणींचा सामना करीत आहे. त्याला पीकविमा मिळाला नाही, शेतकरी दिवसभर शेतात राबतो मात्र, रात्री आराम करण्याऐवजी त्याला सिंचनासाठी शेतात जावे लागते.

अस्वल, रानडुक्कर या वन्यप्राण्यापासून शेतकऱ्यांच्या जिवाला धोका आहे. एक दिवसा लाइट द्या किंवा शेतकऱ्यांना स्वतःच्या रक्षणासाठी बंदुकीची परवानगी द्या, काही शेतकऱ्यांना तुटपुंजी रक्कम शेतकऱ्यांच्या खात्यात टाकून कंपनीने शेतकऱ्यांची थट्टा केली.

त्यामुळे पीकविमा कंपनीने शेतकऱ्यांच्या खात्यात तत्काळ भरीव रक्कम जमा करावी, तसेच अतिवृष्टीमुळे नुकसान झालेल्या शेतकऱ्यांना मदत करावी, या मागणीसाठी स्वाभिमानीचे कार्यकर्ते आक्रमक झाले होते.

दरम्यान, संघटनेचे नेते रविकांत तुपकर यांनी संबंधित विभागाच्या अधिकाऱ्यांसोबत तसेच श्री. दांडगे व इतर अधिकाऱ्यांसोबत चर्चा केली. यानंतर संघटनेच्या पदाधिकाऱ्यांना लेखी आश्वासन दिली.

यावेळी संघटनेचे विधानसभाध्यक्ष मधुकरराव शिंगणे, जिल्हा सरचिटणीस जुल्फिकार शेठ, तालुकाध्यक्ष गणेश शिंगणे, तालुका उपाध्यक्ष अंबादास बुरकुल, वसंतराव दहातोंडे, सिद्धार्थ पटावकर, प्रवीण राऊत, विठ्ठल भोरजे, श्याम राऊत,गुलाब नब्बी, गजानन गुढगे उपस्थित होते.