इस्लामपूर, जि. सांगली : उसाला (Sugarcane Rate) एकरकमी ४ हजार रुपये दर मिळावा या मागणीसाठी बळीराजा शेतकरी संघटनेच्यावतीने ऊस वाहतूक (Sugarcane Transport) करणाऱ्या ट्रॅक्टरचे टायर फोडण्यात आले. येथील आर आयटी कॉलेज, खुंदलापूर वसाहत, बोरगाव वाळवा रस्त्यावर मंगळवारी (ता. ८) सायंकाळी ट्रॅक्टरचे टायर फोडण्यात आले.

एकरकमी ऊसदर घोषित न केल्याने ऊसदर आंदोलन पेटण्याची चिन्हे आहेत. उसाला एकरकमी ‘एफआरपी’ घोषित न करता व शेतकरी संघटनेच्या कार्यकर्त्यांनी निवेदन देऊनही कारखान्यांनी गळीत हंगाम प्रारंभ केला.

त्यामुळे शेतकरी संघटनेचे कार्यकर्ते आक्रमक झाले आहेत. मंगळवारी सायंकाळी बळीराजा संघटनेच्या कार्यकर्त्यांनी ट्रॅक्टरचे टायर फोडले. तसेच अनेक ट्रॅक्टरच्या टायरमधील हवाही सोडली. त्यामुळे ऊसदराचे आंदोलन पेटण्याची चिन्हे आहेत. कारखान्यांनी दर जाहीर केल्याशिवाय ऊसतोडी स्वीकारू नये, असे आवाहन संघटनेने केले आहे.