Pune News : ‘‘ऊसतोड कामगारांना न्याय देण्यासाठी लोकनेते गोपीनाथ मुंडे ऊसतोड कामगार कल्याण महामंडळाच्या वतीने विविध योजना राबविण्यात येतात. त्याचा लाभ घेण्यासाठी ऊसतोड कामगारांनी त्वरित महामंडळाकडे नोंदणी करावी,’’ असे आवाहन समाज कल्याण विभागाचे आयुक्त डॉ. प्रशांत नारनवरे यांनी केले.

ऊसतोड कामगार संबंधातील विविध प्रश्न आणि अडचणींबाबत चर्चा करण्यासाठी साखर आयुक्तालयात नुकतेच बैठकीचे आयोजन करण्यात आले. या वेळी डॉ. नारनवरे यांनी योजनांची माहिती दिली.

साखर आयुक्त चंद्रकांत पुलकुंडवार, कामगार उपआयुक्त डॉ. संतोष कानडे, साखर आयुक्तालयाचे सहसंचालक संतोष पाटील, महाराष्ट्र राज्य सहकारी साखर कारखाना संघाचे व्यवस्थापकीय संचालक संजय खताळ, वेस्ट इंडिया शुगर मिल असोसिएशनचे कार्यकारी संचालक अजित चौगुले, समाज कल्याण विभागाचे प्रादेशिक उपायुक्त बाळासाहेब सोळंकी आदी उपस्थित होते.

ऊसतोड कामगारांच्या समस्या सोडविण्यासाठी महामंडळाच्या माध्यमातून प्रत्येक नोंदणीकृत कामगारांचा विमा उतरविला जाणार आहे. महिलांच्या आरोग्याची काळजी घेतली जाणार आहे. ऊसतोड कामगारांच्या मुला-मुलींच्या शिक्षणासाठी प्रत्येक तालुक्यात वसतिगृहांची उभारणी करण्यात येईल.

यासाठी ऊसतोड कामगारांनी महामंडळाकडे त्वरित नोंदणी करून घेणे आवश्यक आहे. कामगार विभागाच्या निर्देशानुसार अधिकारीदेखील भेटी देऊन निरीक्षण करतील, असे डॉ. कानडे यांनी सांगितले.