वाशीम : यावर्षी अतिवृष्टी, परतीचा पाऊस (Heavy Rainfall) झाल्यामुळे सोयाबीन, कपाशीसह इतर पिकांचे (Crop Damage) प्रचंड नुकसान झाले. त्यातच परतीच्या पावसाने हातातोंडाशी आलेला घास हिरावला. तर दुसरीकडे गतवर्षीच्या तुलनेत उत्पादन खर्चात दीडपट वाढ झाली आहे आणि नेमके उत्पादन (Crop Production) हाती येण्याच्या वेळी भाव गडगडले आहेत. एकंदरीत शेतकरी सर्वबाजूने अडचणीत सापडला आहे. अशावेळी शेतकऱ्यांना आधार देण्याची गरज आहे.

सोयाबीनला साडेआठ हजार, कापसाला साडेबारा हजारांवर दर मिळावा, शेतकऱ्यांना नुकसानभरपाई मिळावी, आदी मागण्यांसाठी राज्यभर आंदोलन पेटविणार असल्याची माहिती स्वाभिमानी शेतकरी संघटनेचे नेते रविकांत तुपकर यांनी दिली.

या आंदोलनाची सुरुवात बुलडाणा येथे ६ नोव्हेंबर रोजी आयोजित एल्गार मोर्चातून होणार असल्याचे ते म्हणाले. तुपकर रविवारी (ता. १६) वाशीम दौऱ्यावर असताना त्यांनी पत्रकार परिषदेत माहिती दिली. यावेळी ‘स्वाभिमानी’चे विदर्भ प्रदेश अध्यक्ष दामोदर इंगोले, केशव तोंडे व इतर पदाधिकारी उपस्थित होते.

तुपकर पुढे म्हणाले, अतिवृष्टी, परतीच्या पावसाने शेतकऱ्यांचे प्रचंड नुकसान झाले आहे. त्याचे पंचनामे अद्याप झालेले नाहीत. शासनाने जाहीर केलेली नुकसानभरपाई अत्यंत तोकडी असून कोणतीही मदत अद्याप शेतकऱ्यांना मिळाली नाही. त्यात आता सोयाबीनचे दर पडले आहेत. सोयाबीनचा एका क्विंटलमागे खर्च ५७८३ आहे मात्र सध्या भाव ४ हजारापर्यत आहे. कापसाला क्विंटलमागे ८१८४ खर्च तर भाव ७ हजारांपर्यंत आहे.

यातून शेतकऱ्यांना उत्पादन खर्च देखील भरुन निघणार नाही. सरकार शेतकऱ्यांकडे लक्ष द्यायला तयार नाही, विरोधक सोयाबीन - कापसावर बोलायला तयार नाही, अशी परिस्थिती आहे. सोयाबीनचा भाव स्थिर राहावा यासाठी सोयापेंड (डीओसी) निर्यातीला प्रोत्साहन द्यावे, मागील वर्षी आयात केलेल्या ५ लाख मेट्रिक टन सोयापेंडला डिसेंबरपर्यंत दिलेली मुदतवाढ रद्द करावी, अशा विविध विषयांची माहिती त्यांनी दिली.

सोयाबीन, कापसासाठी राज्यभर आंदोलन पेटणार असून टप्प्याटप्प्याने हे आंदोलन तीव्र केले जाणार आहे. बुलडाणा येथे ६ नोव्हेंबर रोजी आयोजित एल्गार मोर्चापासून या आंदोलनाची सुरुवात होणार असून मोर्चात आंदोलनाची पुढील दिशा आणि आंदोलनाची रुपरेषा व रब्बीच्या अनुषंगाने मागण्या जाहीर करणार असल्याचेही ते म्हणाले.