अॅग्रोवन वृत्तसेवा
Solapur City : सोलापूर : ‘‘सोलापूर हा धार्मिक पर्यटनस्थळांचा जिल्हा आहे. त्यामुळे या जिल्ह्याला तीर्थक्षेत्र जिल्ह्याचा दर्जा मिळण्यासाठी राज्य शासनाच्या संमतीने केंद्र शासनाकडे प्रस्ताव पाठवू,’’ अशी ग्वाही पर्यटन, कौशल्य विकास आणि उद्योजकता, महिला व बालविकास मंत्री मंगलप्रभात लोढा यांनी येथे दिली.

महाराष्ट्र इन्स्टिट्यूट ऑफ हॉटेल मॅनेजमेंट अँड केटरिंग टेक्नॉलॉजीचे उद्‍घाटन सोमवारी (ता.३) लोढा यांच्या हस्ते झाले. त्याप्रसंगी ते बोलत होते.

या वेळी खासदार डॉ. जयसिद्धेश्‍वर महास्वामी, आमदार विजयकुमार देशमुख, सुभाष देशमुख, सचिन कल्याणशेट्टी, रणजितसिंह मोहिते-पाटील, पर्यटन विभागाच्या प्रधान सचिव राधिका रस्तोगी, महाराष्ट्र पर्यटन विकास महामंडळाच्या महाव्यवस्थापक श्रद्धा जोशी-शर्मा, पर्यटन संचालक बी. एन. पाटील, जिल्हाधिकारी मिलिंद शंभरकर, जिल्हा परिषदेचे मुख्य कार्यकारी अधिकारी दिलीप स्वामी, प्राचार्य चंद्रशेखर जयस्वाल आदी उपस्थित होते.

लोढा म्हणाले, ‘‘भविष्यात या महाविद्यालयातून पर्यटन क्षेत्रासाठी सर्वगुणसंपन्न विद्यार्थी तयार होतील. त्यातून सोलापूरच्या पर्यटन क्षेत्रवाढीसाठी मदत होईल.

त्यामुळेच या महाविद्यालयाच्या उद्‍घाटनासाठी गुरुपौर्णिमेचा दिवस निवडला. पर्यटन आणि हॉटेलिंग क्षेत्रासाठी उत्तमोत्तम शिक्षण व्यवस्था या महाविद्यालयात केली जाईल.’’

महाविद्यालयाला स्वामी समर्थांचे नाव  
जिल्ह्यात धार्मिक पर्यटनस्थळे अधिक असल्याने जिल्ह्यास तीर्थक्षेत्र दर्जा मिळावा, त्यासाठी आवश्यक सोयीसुविधा मिळाव्यात, तसेच या महाविद्यालयाचे श्री स्वामी समर्थ महाविद्यालय असे नामकरण व्हावे, अशी अपेक्षा या वेळी व्यक्त करण्यात आली.

लोकप्रतिनिधींच्या आग्रहानुसार या महाविद्यालयाचे नामकरण ‘श्री स्वामी समर्थ महाराष्ट्र इन्स्टिट्यूट ऑफ हॉटेल मॅनेजमेंट अँड केटरिंग टेक्नॉलॉजी,’ असे करत असल्याची घोषणा लोढा यांनी केली.