सोलापूर : शासकीय योजनेतील १५ व्या वित्त आयोगाच्या (Finance Commission) कामाचे बिल खात्यात जमा केल्याचे बक्षीस म्हणून एक लाखाची लाच (Bribe) मागणाऱ्या ग्रामविकास अधिकाऱ्याला (Rural Development Officer) लाचलुचपत प्रतिबंधक विभागाने पडताळणी करून अटक केली.

गोपीचंद दादा गवळी (वय ५६, पद - ग्रामविकास अधिकारी, ग्रामपंचायत कार्यालय बोराळे, ता. मंगळवेढा, रा. अंकोली, ता. मोहोळ, जि. सोलापूर) असे अटक झालेल्या अधिकाऱ्याचे नाव आहे.

यातील तक्रारदार याचे मित्र हे कॉन्ट्रक्टर असून, त्यांचे मित्रानी मौजे बोराळे, ता. मंगळवेढा येथे शासकीय योजनेतील १५ व्या वित्त आयोगाच्या कामाचे व जिल्हा परिषद सेस निधीअंतर्गत केलेल्या कामाच्या बिलासंदर्भात तक्रारदार पाठपुरावा करीत होते.

सदर कामाच्या बिलाची रक्कम खात्यात जमा केल्याबाबत ग्रामसेवक गोपीचंद गवळी यांनी तक्रारदार यांच्याकडे बक्षीस/मोबदला म्हणून एक लाख रुपयाच्या लाचेची मागणी करून पहिला हप्ता ५०,००० रुपये मागणी केल्याचे लाचलुचपत विभागाने केलेल्या पडताळणीत स्पष्ट झाल्याने त्यांना ताब्यात घेऊन पुढील कारवाई करण्यात येत आहे, ही कारवाई लाचलुचपत प्रतिबंधक विभागाचे पोलिस निरीक्षक चंद्रकांत कोळी, पोलिस हवालदार प्रमोद पकाले, पोलिस शिपाई उमेश पवार, रवी सण्णके, श्‍याम सुरवसे यांनी केली.