Nanded News : प्रधानमंत्री पीकविमा योजनेतर्गत यंदा शेतकऱ्यांना केवळ एक रुपयात पीकविमा योजनेचा लाभ देण्याचा निर्णय राज्य शासनाने घेतला आहे. यामुळे खरीप हंगाम २०२३ मध्ये पीकविमा योजनेत सहभागी होण्याचे प्रमाण वाढल्याने या योजनेला चांगला प्रतिसाद मिळाला आहे.

ता. २६ जुलैपर्यंत जिल्ह्यातील दहा लाख ३३ हजार ८०५ अर्जदार शेतकऱ्यांनी यात सहभाग घेतला आहे. यात शेतकऱ्यांनी सहा लाख ३९ हजार ३९६ हेक्टर क्षेत्र विमा संरक्षित केले आहे.

प्रधानमंत्री पीकविमा योजनेअंतर्गत खरीप हंगाम २०२३-२४ करिता जिल्ह्यात युनायटेड इंडिया इन्शुरन्स कंपनीची नेमणूक केली आहे. यात सोयाबीन, कपाशी, तूर, मूग, ज्वारी, उडीद या सहा पिकांना विमा भरण्याची मुभा शेतकऱ्यांना उपलब्ध करुण दिली आहे. दरम्यान यंदा शेतकऱ्यांचा विमा हप्ता राज्य शासन भरून घेणार आहे.

यामुळे यात सहभागी होणाऱ्या शेतकऱ्यांना केवळ एक रुपया भरुन पीकविमा योजनेत सहभागी होता येत आहे. संरक्षीत रक्कम तीन हजार ४०२ कोटी रुपये निश्‍चित करण्यात आली आहे. मागीलवर्षी संपूर्ण हंगामात दहा लाख ६७ हजार ८०४ अर्जदार शेतकऱ्यांनी पीकविमा योजनेत सहभाग घेतला होता.

यंदा विमा भरण्यासाठी सहा दिवस शिल्लक असताना मागील वर्षाच्या तुलनेत ९६ टक्के अर्जदारांनी यात सहभाग घेतला आहे. यामुळे या योजनेला जिल्ह्यात उदंड प्रतिसाद लाभला आहे.

पीकविमा भरण्याला अडचण

पीकविमा भरण्याची शेवटची तारीख ३१ जुले आहे. अंतिम तारीख जवळ येत असल्याने अनेक शेतकऱ्यांनी विमा भरण्यासाठी घाई केली आहे. परंतु मागील दोन दिवसापासून विमा भरण्यासाठी साइड चालत नसल्याने विमा भरण्यासाठी अडचणीचे जात आहे. यामुळे विमा भरण्याच्या तारीख वाढवून द्यावी अशी मागणी समोर येत आहे.