कोल्हापूर : सेंद्रिय शेतीचा अभ्यास (Organic Farming) करायला जगभरातील संशोधक कणेरी येथील सिद्धगिरी मठावर (Siddhagiri Math) येथील, असा आशावाद मुख्यमंत्री एकनाथ शिंदे (Eknath Shinde) यांनी शनिवारी (ता. ११) व्यक्त केला.

‘सुमंगलम पंचमहाभूत लोकोत्सव’ २० ते २६ फेब्रुवारी या कालावधीत होणार आहे. त्याची तयारी अंतिम टप्यात आली आहे. या तयारीच्या पाहणीसाठी मुख्यमंत्री शिंदे सिद्धगिरी मठावर आले होते, त्या वेळी त्यांनी पत्रकरांशी संवाद साधला.

सुमारे ६५० एकर विशाल परिसरात उत्सवाची तयारी सुरू असून ही तयारी आता अंतिम टप्प्यात आली आहे. या उत्सवात ३० ते ४० लाख लोक सहभागी होणार आहेत, हे गृहीत धरून शासनाच्या विविध विभागांच्या माध्यमातून नियोजनासाठी सिद्धगिरी मठाला सर्वोतोपरी मदत करण्यात येत आहे.

यापुढेही मदत राहील, असे शिंदे यांनी सांगितले. शिंदे यांनी या वेळी पृथ्वी, जल, अग्नी, वायू आणि आकाश या तत्त्वांच्या गॅलरी, मुख्य सभा मंडपासोबतच सोळा संस्कार, आरोग्य अशा गॅलरीना भेट देऊन पाहणी केली.

सिद्धगिरी गोशाळा, सिद्धगिरी हॉस्पिटल व सिद्धगिरी गुरुकुलला भेट देऊन विविध प्रकल्पांची पाहणी केली. मठाधीपती श्री काडसिद्धेश्वर यांनी माहिती दिली. पालकमंत्री दीपक केसरकर यांच्यासह लोकप्रतिनिधी उपस्थित होते.