Matheran News : माथेरानमधील दळणवळणाचे प्रमुख वाहन आजही घोडा असून तो चालविण्यासाठी परवाना दिला जातो. संबंधित विभागाकडून परवाना नूतनीकरणाची तयारी सुरू झाली असून, पशुवैद्यकीय विभागाकडून आतापर्यंत ४६० घोड्यांची रक्त तपासणी करण्यात आली आहे.

माथेरानमध्ये मोटार वाहनांना बंदी असल्याने बहुतांश पर्यटक फिरण्यासाठी घोड्यांचा आधार घेतात. माथेरानमध्ये अनेक पॉइंट असून रस्‍ता चढ-उताराचा आहे. त्‍यामुळे घोडा सुदृढ असावा यासाठी ब्रिटिशकाळापासून पशुवैद्यकीय अधिकारी यांची परवाना नूतनीकरणात महत्त्वाची भूमिका आहे.

घोड्यांची तपासणी केल्‍यावर प्रमाणपत्र दिले जाते. या प्रमाणपत्राच्या आधारे रायगड जिल्हा पोलिस अधीक्षक यांच्या आदेशाने पोलिसांकडून अश्‍वपालांना परवाना दिला जातो. त्‍याच वेळी माथेरान नगरपालिकाही प्रत्येक अश्वामागे रस्‍ता शुल्‍क आकारते.

तीनही विभागांच्या सयुक्तिक कार्यवाहीनंतर अश्‍व परवाना नूतनीकरण होते. हे नूतनीकरण प्रत्येक वर्षी मार्च महिन्यात होते, मात्र यंदा ते मे महिन्यात होणार आहे.

माथेरानमध्ये घोडा हे प्रमुख वाहन असल्याने ग्लॅडर (glandar) रोगापासून घोडा सुरक्षित राहिला तर पर्यटक सुरक्षित राहिल्यासारखे आहे. परवाना देताना घोड्याची पूर्ण तपासणीअंती आमच्याकडून प्रमाणपत्र दिले जाते.

यंदा तपासणीची सुरुवात रक्त नमुना घेऊन केली आहे. याचे प्रमाणपत्र पोलिसांना दिल्‍यावर नगरपालिकेकडून रस्‍ता कर भरल्‍याची पावतीही जोडावी लागते. त्‍यानंतर परवाना दिला जातो.

- अमोल कांबळे, पशू वैद्यकीय अधिकारी