Tulajapur News : शेतकर्‍यांच्या विविध समस्यांकडे सरकारचे लक्ष वेधण्यासाठी स्वाभिमानी शेतकरी संघटनेच्यावतीने तुळजापूर येथील जुन्या बस स्थानकासमोर मंगळवार (ता.२२) रोजी दुपारी १२ वाजता रास्तारोको आंदोलन करण्यात येणार आहे.

स्वाभिमानी शेतकरी संघटनेचे जिल्हाध्यक्ष रवींद्र इंगळे यांच्यासह पदाधिकार्‍यांनी तुळजापूर तहसीलदारांना याबाबत निवेदन दिले आहे.

निवेदनात म्हटले आहे की, रासायनिक खतांची भाववाढ थांबवून ती शेतकर्‍यांना योग्य दरात उपलब्ध करून द्यावी, शेतकरी विकत घेत असलेल्या बियाणे, फवारणीसाठी लागणारे औषधे, रासायनिक खते, कीटकनाशक औषधे यावर कोणत्याही प्रकारची जीएसटी लावू नये.

शेतकर्‍यांसाठी वन्य प्राण्यांपासून पिकाचे संरक्षण व्हावे म्हणून तार कुंपण करण्यासाठी शंभर टक्के अनुदान द्यावे, चालू खरीप हंगाम पावसाच्या लहरीपणामुळे धोक्यात आला आहे. यामुळे सद्यस्थितीत शेतकरी हवालदिल झाला आहे तरी अनुदान स्वरूपात मदत उपलब्ध करून द्यावी.

शेतकर्‍यांना दिवसा वीज पुरवठा सुरळीत करून द्यावा, शेतकर्‍यांना संपूर्ण कर्जमुक्ती करावी, चालू खरीप हंगाम पूर्ण धोक्यात असल्यामुळे पीकविमा मंजूर करावा, या मागण्यांकडे सरकारचे लक्ष वेधून शेतकर्‍यांना न्याय मिळावा याकरिता हे आंदोलन करण्यात येणार असल्याची माहिती निवेदना द्वारे देण्यात आली.