सिंधुदुर्गनगरी ः जिल्ह्यात खरीप हंगामातील (Kharif season) बहुतांश कामे अंतिम टप्प्यात असतानाच रब्बी हंगामातील (Rabi season) पेरण्यांना सुरुवात झाली आहे. कुळीथ, भाजीपाला, भुईमूग, भातपिकासह विविध पिके रब्बी हंगामात घेतली जातात.

जिल्ह्यात खरीप हंगामात सर्वाधिक भातपीक लागवड होते. सध्या भातपीक कापणी अंतिम टप्प्यात असून दोन ते तीन दिवसांत कापणी, मळणीची कामे पूर्ण होण्याची शक्यता आहे. परंतु ज्या शेतकऱ्यांची खरीप हंगामातील कामे पूर्ण झाली आहेत.

त्यांनी रब्बी हंगामाच्या तयारीला सुरुवात केली आहे. जिल्ह्याच्या अनेक भागांत कुळीथ पीक घेतले जाते. पाण्याची उपलब्धता कमी असलेल्या भागात हे पीक अधिक घेतले जाते. सध्या अनेक भागांत कुळीथ पेरणी सुरू आहे. याशिवाय भुईमूग, भाजीपाला, कडधान्य, भात पीक पेरणीची लगबग शेतकऱ्यांची सुरू आहे.