Kharif Season Review Meeting : कांदा आणि ट्रोमॅटोचे भाव पडल्याने शेतकरी संतप्त आहे. नाफेडमार्फत कांदा खरेदी करण्याच्या मागणीसाठी शेतकरी आक्रमक आहेत. आज मुख्यमंत्री एकनाथ शिंदे यांच्या अध्यक्षतेखाली राज्यस्तरीय खरीप हंगाम पूर्व आढावा बैठक पार पडली. या बैठकीनंतर उपमुख्यमंत्री देवेंद्र फडणवीस यांनी पत्रकार परिषद घेतली.

यावेळी पत्रकारांनी शेतमालाला भाव मिळत नसल्याचा प्रश्न उपस्थित करताच अरे.. तुम्ही तेच ते प्रश्न विचारता. सप्लाय वाढल्याने भाव पडले आहेत. तरी शेतकऱ्यांना मदत करण्यास सरकार तयार आहे, असे फडणवीस यांनी सांगितले.

फडणवीस म्हणाले, कांद्याला महाराष्ट्रात जे अनुदान दिले जाते. ते अनुदान इतर राज्यांच्या तुलनेत सर्वात जास्त आहे. तरी उत्पादन जास्त झाल्याने मागणीपेक्षा पुरवठा अधिक होतो. त्यामुळे पिकांचे भाव पडतात. त्यामुळे शेतकऱ्यांनी इतर पिकांकडेही लक्ष दिले पाहिजे. शेतकऱ्यांना मदत करण्यास सरकार तयार आहे. त्यामुळे शेतकऱ्यांनी टोकाचे पाऊल उचलू नये, असे आवाहन केले आहे.

जलयुक्त शिवार योजनेबद्दल माहिती देताना फडणवीस यांनी सांगितले की, जलयुक्त शिवार २.० ची सुरुवात केली जाणार आहे. मान्सूनचा पाऊस येणार असल्याने राज्यात जलसंधारणाची कामे जलद गतीने करायची आहे. त्यासाठी जुनी स्ट्रक्चर दुरुस्ती, नाला खोलीकरण अशी कामे केली पाहिजे. यासाठी जिल्हाधिकाऱ्यांनी पुढाकार घेतला पाहिजे. सर्व जिल्ह्यांतील जलसंधारणाच्या कामांचा आढावा घेण्यात आला आहे. अनेक ठिकाणी कामे सुरू आहे. काही ठिकाणी लवकरच कामे सुरू केली जातील.