कोल्हापूर : शिरोळ तालुक्यात परतीच्या पावसाने झालेल्या नुकसानीचे पंचनामे प्रशासनाच्या वतीने पूर्ण करण्यात आले. आठवड्याभरात युद्धपातळीवर करण्यात आलेल्या पंचनाम्यात तालुक्यातील ३५३० शेतकऱ्यांची १२५६ हेक्टरमधील पिकांचे नुकसान झाले आहे.

२१ ऑक्टोबर रोजी शिरोळ तालुक्यात ढगफुटीच्या झालेल्या पावसात प्रचंड नुकसान झाले होते. प्रशासनाच्या आदेशानुसार कृषी, महसूल, ग्रामविकास या विभागाच्या वतीने संयुक्तरीत्या युद्धपातळीवर सात दिवसांत पंचनामे पूर्ण करण्यात आले. यात नुकसानग्रस्त शेतकरी आणि त्यांच्या जमिनीची माहिती उपलब्ध झाली आहे.

शिरोळ तालुक्यात सहा महसूल मंडलांतील ४४ गावांपैकी ४२ गावांत ढगफुटी झाली होती. यात जयसिंगपूर, उदगाव, चिंचवाड, शिरोळ, शिरटी, अर्जुनवाड, नांदणी यांसह परिसरात शेतीचे प्रचंड नुकसान झाले होते. आमदार राजेंद्र पाटील यड्रावकर यांनी नुकसान ग्रस्त भागाचे पंचनामे सुरू करण्याचे आदेश दिले होते.

तहसीलदार अपर्णा मोरे-धुमाळ, गटविकास अधिकारी शंकर कवितके, तालुका कृषी अधिकारी गणेश भोसले यांच्या मार्गदर्शनाखाली ५९ कर्मचाऱ्यांकडून पंचनामे सुरू केले होती, ते बुधवारी (ता. २) पूर्ण झाले. यात १२५६ हेक्टरमधील ३५३० शेतकऱ्यांचे नुकसान झाले आहे. तर जिरायतमध्ये १५०६ शेतकऱ्यांची ६०० हेक्टरमध्ये, बागायतीमध्ये ६४५.५५ हेक्टरमध्ये १९४५ शेतकरी, तर बहुवार्षिकमध्ये २५ हेक्टरमधील ३६ शेतकऱ्यांचे नुकसान झाले आहे.