रसायनी : परिसरात सहा दिवसांपासून हवामानात बदल (Environmental Change) झाला आहे. पाऊस थांबला असून आकाश निरभ्र; कडक ऊन पडत आहे. त्यामुळे शेतकऱ्यांनी दिवाळी सण साजरा झाल्यानंतर खरिपाच्या हंगामातील भातकापणीच्या कामांना (Paddy Harvesting) सुरुवात केली आहे.

अनेक शेतकऱ्यांनी लगबगीने भात पिकाचे कापणीची आणि पाठोपाठ दोन दिवसांनी झोडपणीची काम सुरू केली आहे. दरम्यान परतीच्या पावसाने भात पिकाचे काही शेतकऱ्यांचे नुकसान केले आहे.
परिसरातील वासांबे मोहोपाडा, चावणे, आपटे, वडगाव पंचक्रोशीतील शेतकरी खरिपाच्या हंगामात भाताचे पीक घेत आहे.

यावर्षी पाऊस वेळेत झाल्याने शेतकऱ्यांची भात लावणीची काम वेळेवर झाली. वेळेवर पाऊस पडल्याने पीकही चांगले आले. मात्र, कापणीसाठी पीक तयार होताच परतीच्या पावसाचा फटका बसला. पावसामुळे कापणीला आलेल्या भाताच्या पिकांचे नुकसान झाले, असे अनंता पाटील यांनी सांगितले.

आता हवामानात बदल झाला आहे. सहा दिवसांपासून वातावरण निवळले आहे. ऑक्टोबर महिन्याची हीट त्यात मध्येच गारवा जाणवत आहे. त्यामुळे पुन्हा निसर्गाच्या लहरीपणाचा फटका बसेल, या भीतीने शेतकऱ्यांनी लगबगीने भातकापणीची कामे सुरू केली
आहेत. कापणीनंतर दोन दिवसांनी झोडपणीच्या कामांना सुरुवात केली जाणार असल्याचे सखाराम पाटील यांनी
सांगितले.