अलिबाग ः रायगड जिल्ह्यामध्ये भात कापणीच्या (Paddy Harvest) कामांना वेग आला असून मजुरांसह शेतकरी, त्यांचे कुटुंबीय, मित्रमंडळी, गावातील तरुण कापणीसाठी मदतीला येत आहेत.

जिल्ह्यात जवळपास ९५ हजार हेक्टर क्षेत्रामध्ये भात लागवड करण्यात आली आहे. यंदा पाऊस समाधानकारक पडल्‍याने भाताची रोपे चांगली तयार झाली होती. मात्र परतीच्या पावसामुळे भात कापणी लांबणीवर गेली. मात्र दिवाळी झाल्‍यावर जिल्‍ह्यात बहुतांश ठिकाणी भात कापणीला सुरुवात झाली.

पहाटे पाच वाजल्यापासून सकाळी दहा वाजेपर्यंत त्यानंतर काही ठिकाणी दिवसभर मजुरीवर भात कापणीची कामे सुरू आहेत. तर काही शेतकऱ्यांनी भात कापणी करून जागेवरच झोडणी सुरू केली केली. तर काही ठिकाणी कापणी करून शेतावर अथवा माळावर भाताची उडवी रचण्याचे काम सुरू आहे.