अॅग्रोवन वृत्तसेवा
Pune News : शेतीपंपाच्या थकित वीजबिलावरील (Electricity Bill ) व्याज व दंडमाफी यांसह थकबाकीच्या रकमेत तीस टक्के सवलतीचा लाभ घेण्याची मुदत मार्चअखेर संपली.
महावितरणच्या पुणे परिमंडलातील २२ हजार ८२६ शेतकरी या योजनेचा लाभ घेतला. चालू वीजबिलांसह थकबाकीच्या ६८ कोटी रुपयांचा भरणा करत हे शेतकरी थकबाकीमुक्त झाले आहेत.

एप्रिलनंतर थकित वीजबिलांवर सवलतीची (Electricity Bill Discount) वीस टक्के रक्कम भरावी लागणार आहे, अशी माहिती महावितरणकडून देण्यात आली.

कृषिपंप धोरणांतर्गत शेतीपंपांच्या थकबाकीच्या पहिल्या टप्प्यात वीजजोडणी, वीजबिलाच्या रकमेत पन्नास टक्केसवलत देण्यात आली.

त्यानंतर सध्या सुरूअसलेल्या दुसऱ्या टप्प्यात शेतीपंपांच्या वीजबिलाच्या थकबाकीत तीस टक्के सवलत आणि व्याज व दंडमाफी मिळविण्यासाठी मार्चअखेरची मुदत होती.

पुणे परिमंडलामध्ये आतापर्यंत ५७ हजार २१० शेतकऱ्यांनी वीजबिल थकबाकीमुक्तीच्या योजनेत सहभाग नोंदविला आहे. त्यांनी ८० कोटी ६१ लाख रुपयांचे चालू वीजबिल तसेच सुधारित थकबाकीपोटी ५५ कोटी ७३ लाख रुपयांचा भरणा केला आहे.

या सर्व शेतकऱ्यांच्या वीजबिलांच्या थकबाकीवरील व्याज व दंड आणि तीस टक्के सवलतीतून एकूण ९८ कोटी ७९ लाख रुपये माफ करण्यात आले आहेत.

त्यापैकी २२ हजार ८२६ शेतकऱ्यांनी या योजनेचा लाभ घेत चालू वीजबिलांसह थकबाकीच्या ६८ कोटी रुपयांचा भरणा करून ते थकबाकीमुक्त झाले आहेत.

वीजबिल कोरे केलेल्या या शेतकऱ्यांना थकबाकीच्या रकमेतून ४० कोटी ६६ लाख रुपयांची सवलत मिळाली आहे.

दरम्यान, पुणे, पिंपरी-चिंचवड आणि जिल्ह्यातील आंबेगाव, जुन्नर, मावळ, खेड, मुळशी, वेल्हे, हवेली तालुक्यांतील १ लाख २६ हजार २४२ शेतकऱ्यांकडे ९२६ कोटी ५९ लाख रुपयांची मूळ थकबाकी होती.

सरकारच्या योजनेअंतर्गत या थकबाकीवरील व्याज व दंड आणि तीस टक्के सवलतीतून एकूण १४५ कोटी ८५ लाख रुपये आतापर्यंत माफ करण्यात आले आहेत, असे महावितरणकडून सांगण्यात आले.