Jalgaon News : खानदेशातील अवैध एचटीबीटी (हर्बीसाईड टॉलरंट) कापूस बियाणे व पोटॅशचा काळाबाजार यासंबंधी नाशिक येथील विभागीय कृषी सहसंचालक यांनी जळगाव व धुळे जिल्ह्यातील मोहीम अधिकारी यांना नोटीस बजावली आहे. आपणास निलंबित का करू नये, अशी विचारणा त्यात करण्यात आली आहे.

‘अॅग्रोवन’ने खानदेशातील पोटॅशची टंचाई व काळाबाजार आणि एचटीबीटीसंबंधीचा काळाबाजार, यामुळे होणारी शेतकऱ्यांची लूट व फसगत या बाबत मुख्य पानावर वृत्त प्रसिद्ध केले.

याची दखल कृषी विभागाच्या वरिष्ठांनी घेतली आणि जळगाव व धुळे येथील जिल्हा परिषदेतील कृषी विभागांमधील मोहीम अधिकारी यांना कारणे दाखवा नोटीस बजावल्या आहेत. आठ दिवसांत त्याचे उत्तर मागितले असून, आपणास निलंबित का करू नये, अशी विचारणा केली आहे.

या वृत्तामुळे काळाबाजार करणाऱ्या मंडळीचे धाबे दणाणले असून, कृषी विभागाने यासंबंधी कारवाईसत्र राबविण्यास सुरुवात केली आहे. जळगाव, धुळे जिल्ह्यात कारवाईसाठी सापळे लावण्यात आले असून, शेतकऱ्यांना विश्वासात घेऊन माहिती गोळा करण्यात येत आहे.