दापोली, जि. रत्नागिरी ः महाराष्ट्र लोकसेवा आयोगातर्फे (MPSC) कृषी सेवा मुख्य परीक्षा २०२१-२०२२ ला तत्काळ स्थगिती देऊन अभ्यासक्रम पूर्वीप्रमाणे करावे, स्वतंत्र कृषी अभियांत्रिकी संचालनालय स्थापन करावे. यासह विविध मागण्यांसाठी कृषी अभियांत्रिकीच्या विद्यार्थ्यांनी धरणे आंदोलन (Agri Student Protest) सुरू केले आहे.

दापोली येथील कोकण कृषी विद्यापीठात दोनशेहून अधिक विद्यार्थी या आंदोलनात सहभागी झाले आहेत.

आंदोलनाचा हा सातवा दिवस आहे. राज्य कृषी सेवा परीक्षेत कृषी व अभियांत्रिकी यांचे पूर्वीप्रमाणेच वैकल्पिक पेपर ठेवण्यात यावेत व तोपर्यंत राज्य कृषी मुख्य परीक्षा २०२१ व २०२२ सेवेच्या वरील दोन्ही जाहिरातींना स्थगिती देण्यात यावी, अशी मागणी कृषी अभियांत्रिकीच्या विद्यार्थ्यांनी सादर केलेली आहे.

विद्यार्थ्यांच्या मागण्यांचा सहानुभूतिपूर्वक विचार करावा, अशी विनंती डॉ. बाळासाहेब सावंत कोकण कृषी विद्यापीठ कर्मचारी समन्वय संघातर्फे एका पत्राद्वारे महाराष्ट्र लोकसेवा आयोगाच्या अध्यक्षांना करण्यात आली आहे.