Maharashtra IMD Rainfall Alert : राज्यात पावसाला पोषक हवामान असले तरी, मॉन्सूनचा पाऊस काहीसा कमजोर झाला आहे. आज (ता. २३) विदर्भात विजांसह पावसाचा इशारा देण्यात आला आहे. कोकणात तुरळक ठिकाणी जोरदार पावसाचा, तर उर्वरित राज्यात हलक्या पावसाचा अंदाज हवामान विभागाने वर्तविला आहे.

मॉन्सूनचा आस असलेला कमी दाबाचा पट्टा सर्वसाधारण स्थितीच्या काहीसा उत्तरेकडे सरकला आहे. हा आस पंजाबच्या अमृतसर, कर्नाल, मेरठ, लखनौ, गया, मालदा ते नागालँडपर्यंत विस्तारला आहे. मध्य प्रदेशाच्या मध्य भागात समुद्रसपाटीपासून ३.१ ते ४.५ किलोमीटर उंचीवर चक्राकार वारे वाहत आहेत. दक्षिण कर्नाटकपासून कोमोरिन भागापर्यंत हवेचा पूर्व पश्चिम कमी दाबाचा पट्टा सक्रिय आहे. उत्तर तमिळनाडू आणि रायलसीमा भागात चक्राकार वाऱ्यांची स्थिती आहे.

राज्यात ऊन-सावल्यांचा खेळ

राज्यात ढगाळ हवामानासह ऊन-सावल्यांचा खेळ सुरू आहे. तुरळक ठिकाणी एखादी दुसरी सर येत आहे. आज (ता. २३) विदर्भात विजांसह पावसाचा इशारा देण्यात आला आहे. तर कोकणात तुरळक ठिकाणी जोरदार पावसाची शक्यता आहे. उर्वरित राज्यात हलक्या पावसाचा अंदाज हवामान विभागाने वर्तविला आहे.