पुणेः शेतीमधील मूल्यसाखळी विकसित करण्यासाठी आशियायी विकास बॅंकेच्या सहकार्याने राबविण्यात येणाऱ्या महाराष्ट्र ॲग्रीबिझनेस नेटवर्क प्रकल्पास (Maharashtra Agribusiness Network Project) ५१ कोटींचा निधी वितरित करण्यात आला आहे. या निधीमुळे या प्रकल्पांतर्गत मंजूर असलेल्या विविध कामांना गती मिळणार आहे.

हा प्रकल्प महाराष्ट्रात विविध जिल्ह्यांमध्ये मूल्यसाखळी (Agriculture Value Chain) विकसित करण्यासाठी राबविण्यात येत आहे. या प्रकल्पासाठी राज्य शासन आणि आशियायी विकास बॅंकेद्वारे १ हजार कोटींच्या निधीची मंजुरी आहे.

मात्र काही तांत्रिक बाबींमुळे निधी रखडला होता. मात्र आता हा निधी वितरणास (Fund Distribution) सुरुवात झाली असून, ५० कोटींचा निधी नुकताच वितरित करण्यात आला आहे. या प्रकल्पांतर्गत ११ फलोत्पादन पिकांच्या मूल्यसाखळी विकसित करण्यासाठी २३० कोटींच्या प्रकल्पांना मंजुरी देण्यात आली आहे. या प्रकल्पांसाठीच्या पहिल्या टप्प्यासाठी ५१ कोटी १९ लाखांचा निधी शासनाने वितरित केला आहे.