शिवसेनेचे ज्येष्ठ नेते व नगरविकासमंत्री एकनाथ शिंदे (Eknath Shinde) यांच्या बंडाचा आज तिसरा दिवस आहे. पण अद्याप त्यांनी भाजपसोबतच्या वाटचालीबाबत खुलासा केलेला नाही. पण शिंदे गट आणि भाजपमध्ये सत्तास्थापनेसाठी वाटाघाटी सुरू असल्याची चर्चा आहे. शिंदे हे शिवसेना सोडणार की वेगळा गट करून भाजपला पाठिंबा देणार, याबाबत संभ्रम असतानाच शिंदे यांना त्यांचा गट आधी विलीन करण्याची अट भाजपकडून घालण्यात आल्याचा दावा वंचित बहूजन आघाडीचे नेते प्रकाश आंबेडकर (Prakash Ambedkar) यांनी केला.

प्रकाश आंबेडकर (Prakash Ambedkar)यांनी याबाबतचे ट्विट केले आहे. शिंदे गटाने भाजपमध्ये विलीन होण्याचा प्रस्ताव ठेवल्याचे आंबेडकरांनी म्हटले. पण त्यांनीही याबाबत प्रश्नचिन्ह उपस्थित करून चर्चेला तोंड फोडले आहे. 'एकनाथ शिंदे यांच्यासोबत असणाऱ्या गटाने भाजपमध्ये विलीन व्हावे आणि मगच सरकार स्थापन होईल अशी अट भाजपने एकनाथ शिंदेंना घातली आहे?,' असे ट्विट आंबेडकर यांनी केले.

शिंदे यांनी सुरूवातीपासूनच आपण शिवसेना सोडणार नसल्याचे स्पष्ट केले आहे. त्यामुळे ते भाजपमध्ये जाणार नाहीत, अशी शक्यता आहे. ते वेगळा गट करूनच भाजपला पाठिंबा देत सरकारमध्ये सहभागी होतील, याचीच दाट शक्यता आहे. महाविकास आघाडीतून बाहेर पडण्याची वेळ आल्याचेही त्यांनी स्पष्ट केलेले आहे.

शिंदे यांच्या बंडामागे भाजपची (BJP) आणि त्यातही विरोधी पक्षनेते देवेंद्र फडणवीस (Devendra Fadnavis) यांची फूस असल्याची चर्चा राजकीय वर्तुळात आहे. तरीही एकनाथ शिंदे यांच्या बंडानंतर भाजप काय आणि कशी भूमिका घेणार, याविषयी फडणवीस यांनी भाष्य केलेले नाही.

१२ खासदारांचाही शिंदेंना पाठिंबा ?

दरम्यान आमदारांच्या बंडखोरीची चर्चा असतानाच आता बारा खासदारही शिंदे यांच्यासोबत जाण्याची शक्यता असल्याचे वृत्त समोर येत आहे. शिवसेनेचे १८ खासदार असून १२ खासदार शिंदे यांच्यासोबत जाणार असतील तर हा ठाकरेंसाठी आणखी मोठा धक्का असेल. त्यामुळे आता ठाकरे पुढे काय निर्णय घेणार याबाबत उत्सुकता वाढली आहे.