Solapur News : गेल्या साडेतीन महिन्यांपासून पाऊस नाही. त्यामुळे शेतीला पाणीटंचाई जाणवत आहे. शेतीमालाला दर नाही. पाऊस नसल्याने उसाची वाढ झालीच नाही. अशा संकटांचा शेतकरी सामना करत असतानाच आता शेतात उभ्या असलेल्या उसावर ‘हुमणी’चा प्रादुर्भाव झाल्याने उसाची बेटे उन्मळून पडत आहेत. शेतकऱ्यांसमोर हे नवीन संकट उभे ठाकले आहे.

पावसाळा सुरू होऊन सुमारे साडेतीन महिने झाले आहेत. एकाही नक्षत्रात दमदार पाऊस पडला नाही. आता भरवशाची म्हणले तर उत्तरा व हस्त ही दोन नक्षत्रे राहिली आहेत. सध्या उत्तरा नक्षत्र सुरू आहे.

पाऊस नसल्याने विहिरींची व बोअरची पाणी पातळी खालावली आहे. भरीस भर म्हणून उन्हाळ्यासारखे कडक ऊन पडू लागले आहे. त्यामुळे उपलब्ध पाण्याचे बाष्पीभवन मोठ्या प्रमाणात होत आहे. काही शेतकऱ्यांनी उसाला ठिबक सिंचन केले, तर काहींनी नाही. त्यातच उसावर हुमणीचा प्रादुर्भाव झाला आहे.

शेतात उभ्या असलेल्या उसाच्या बेटाच्या मुळ्या बुडातून कांडरल्याने बेटे उन्मळून पडू लागली आहेत. त्यामुळे शेतकरी हतबल झाला आहे.

पाऊस नसल्याने अगोदरच उसाच्या वजनात मोठी घट झाली आहे, नव्या संकटामुळे वजनात पुन्हा जास्तच घट होणार आहे. शेतकऱ्यांच्या संकटात नव्याने भर पडली आहे.