Pune News : गेल्या काही वर्षांपासून सोयाबीनच्या क्षेत्रात दिवसेंदिवस वाढ होत आहे. आगामी काळात शेतकऱ्यांना मोठ्या प्रमाणात सोयाबीनचे बियाणे उपलब्ध होण्याच्या उद्देशाने कृषी विभागाने पुढाकार घेतला आहे.

यंदा खरीप हंगामात पुणे जिल्ह्यात सोयाबीनचे ग्रामबीजोत्पादनासाठी घरचे बियाणे मोहीम राबविण्यात येणार आहे. त्यामुळे येत्या काळात सोयाबीनचे मोठ्या प्रमाणात बियाणे उपलब्ध होण्याची शक्यता आहे.

कृषी विभागाकडून सोयाबीनच्या बीजोत्पादनाचा कार्यक्रम राबविण्यात येणार आहे. गेल्या वर्षी खरीप हंगामात घरचे बियाणे मोहीम राबविण्यात आली होती. याचप्रकारे चालू वर्षीही ही मोहीम अधिक व्यापक स्वरूपात राबविण्यात येत आहे. यंदा जिल्ह्यात ४१ हजार ५५ हेक्टर क्षेत्र आहे. त्यासाठी सुमारे ४१ हजार ५५ क्विंटलची आवश्यकता असते.

गेल्या वर्षी या मोहिमेत सुमारे ८ हजार ७९ शेतकरी सहभागी झाले होते. त्यांनी ४२ हजार २७० क्विंटल बियाण्यांचे उत्पादन घेतले होते. तरीही वाढीव क्षेत्रासाठी गुणवत्तापूर्ण बियाण्याची आवश्यकता असते. यासाठी मोठ्या प्रमाणात मोहीम राबविण्याचा निर्णय कृषी विभागाने घेतला आहे.

गेल्या वर्षी पावसाळ्यात मोठ्या प्रमाणात सोयाबीनची पेरणी झाली होती. परंतु काढणीच्या वेळेस अति झालेल्या पावसामुळे सोयाबीनचे मोठे नुकसान झाले होते. त्यामुळे चालू वर्षी खरीप हंगामात सोयाबीन बियण्यांची काही प्रमाणात अडचण भासण्याची शक्यता आहे.

ऐन वेळेस शेतकऱ्यांना अडचणी येऊ नये यासाठी ही मोहीम राबवत शेतकऱ्यांनी घरच्या घरी ग्रामबीजोत्पादन मोहीम राबवून घरीच चांगल्या दर्जाचे सोयाबीनचे बियाणे तयार करण्यासाठी विशेष मोहीम हाती घेण्यात आली आहे. त्याचा फायदा शेतकऱ्यांनी घ्यावा, असे आवाहनही कृषी विभागाने केले आहे.