Nanded News : मागील एका महिन्याच्या अधिक कालापासून दडून बसलेल्या पावसाने मंगळवारी (ता. ४) समाधानकारक सुरुवात केली. हा पाऊस जिल्ह्याच्या किनवट आणि माहूर तालुक्यात जोरदार झाला यामुळे किनवटमधील दोन मंडलांत अतिवृष्टीची नोंद झाली. मागील २४ तासांत जिल्ह्यात १९.१० मिलिमीटर पावसाची नोंद झाल्याची माहिती महसूल प्रशासनाच्या सूत्राने दिली.

नांदेड जिल्ह्यात जून महिन्यामध्ये केवळ ३० टक्केच पाऊस झाला होता. यामुळे खरिपातील पेरण्या रखडल्या होत्या. जून संपूनही जुलैच्या तीन तारखेपर्यंत पाऊस तुरळकच होता. परंतु चार तारखेला जिल्ह्यात पावसाने हजेरी लावली. मंगळवारी हा पाऊस जिल्ह्यातील सर्व तालुक्यांत झाला. यात प्रामुख्याने किनवट, माहूर व मुखेड तालुक्यांत पावसाचा जोर अधिक होता.

यामुळे किनवट तालुक्यातील इस्लापूर मंडलात ११३.५० मिलिमीटर, तर दहेली मंडलात ९९.७५ मिलिमीटर पावसाची नोंद झाल्यामुळे या ठिकाणी अतिवृष्टी नोंदली गेली आहे. या पावसामुळे जिल्ह्यात रखडलेल्या पेरण्यांना सुरुवात झाल्याची माहिती कृषी विभागाकडून मिलाली. परंतु जिल्ह्यातील अनेक भागांत अद्याप समाधानकारक पाऊस झाला नाही.

यामुळे शेतकऱ्यांनी शंभर मिलिमीटर पाऊस झाल्याशिवाय पेरणी करू नये, असे आवाहन कृषी विभाग तसेच जिल्हा प्रशासनाच्या वतीने करण्यात आले आहे. मंगळवारी झालेला पाऊस मुखेड तालुक्यातील येवती मंडलात ६२.५ मिलिमीटर, जाहूर ६२.५, बाऱ्हाळी ५७.८, मुक्रमाबाद ३६.५, सिंदखेड ३२, तामसा ३६, माहूर ५१, मांडवा ४३, जलधारा ४२, वाई ३५, शिंदगी ३५, उमरी बाजार ३९, किनी ४८.३ मिलिमीटर पावसाची नोंद झाली.

तालुकानिहाय झालेला पाऊस (मिलिमीटरमध्ये)

नांदेड ९.४०, बिलोली १३.४० मुखेड ४२, कंधार १३, लोहा १२.८०, हदगाव १५, भोकर २३.४०, देगलूर २.४०, किनवट ४८.७०, मुदखेड १४.५०, हिमायतनगर २५, माहूर ३८.७०, धर्माबाद ६.६०, उमरी चार, अर्धापूर १३.२०, नायगाव ३.४० मिलिमीटर. चोवीस तासांतील सरासरी १९.१० मिलिमीटर. आजपर्यंत जिल्ह्यात सरासरी ७१.१० मिलिमीटर वार्षिक सरासरीच्या आठ टक्के पाऊस बंद झाला आहे.