Jalgaon News : खानदेशात यंदा सूर्यफूल व भुईमुगाची पेरणी वाढेल, असे संकेत आहेत. यामुळे सूर्यफूल बियाणे मुबलक प्रमाणात उपलब्ध करून देण्याची मागणी शेतकरी करीत आहेत.

भुईमुगाचे बियाणे बाजारात दाखल झाले आहे. सूर्यफुलाचे बियाणेदेखील मुबलक आहे, असा दावा कृषी विभाग करीत आहे. रब्बीतही भुईमूग, सूर्यफुलाची पेरणी बऱ्यापैकी झाली होती. काही तेलबियांचे दर टिकून आहेत.

तेलबियांना उठावदेखील आहे. सोयाबीनच्या दरात पुन्हा एकदा तेजी येत आहे. तसेच भुईमूग, सूर्यफुलाचे दरही टिकून आहेत. रब्ब्बीत भुईमुगाचे एकरी १० ते १२ क्विंटल उत्पादन अनेक शेतकऱ्यांना आले. त्याचे दरही बऱ्यापैकी मिळाले. तसेच सूर्यफुलाचे उत्पादनदेखील एकरी २० ते २२ क्विंटल एवढे आले.

त्याचे दरही प्रतिक्विंटल सहा हजारांपर्यंत मिळाले. यामुळे शेतकरी सूर्यफूल पेरणीकडे वळले आहेत. खानदेशात यंदा भुईमुगाची मिळून पाच हजार हेक्टरवर तर सूर्यफुलाचीदेखील सुमारे अडीच ते तीन हजार हेक्टरवर पेरणी होईल.

सातपुडा पर्वत भागात ही पेरणी अधिक असणार आहे. जलसाठेही मुबलक आहेत. अनेक शेतकरी पाऊस न आल्यास पर्यायी व्यवस्था म्हणून ठिबकवर भुईमूग पेरणीचे नियोजन करीत आहेत.

काही शेतकरी तुषार सिंचनाचा उपयोग करून भुईमूग लागवडीचे नियोजन करीत आहेत. त्यासाठी जळगाव जिल्ह्यातील पाल (ता. रावेर), ममुराबाद (ता. जळगाव) येथील कृषी विज्ञान केंद्रदेखील पुढाकार घेत आहेत.

जळगाव जिल्ह्यात चोपडा, यावल, रावेर, धुळ्यातील शिरपूर, धुळे, नंदुरबारमध्ये तळोदा, शहादा भागात भुईमूग लागवड वाढेल, असे संकेत आहेत. तर सूर्यफुलाची पेरणी सर्वत्र कमी अधिक क्षेत्रात होईल. सूर्यफूल बियाण्यांचा काळाबाजारही सुरू आहे. सूर्यफूल बियाणे विक्री वाजवी दरात व्हावी. कारण शेतकरी ज्या वेळी बाजारात बियाण्यासाठी जातात,त्या वेळी त्याचे दर वधारतात किंवा कृत्रीम टंचाई तयार होते.