Kolhapur News : कोल्हापूर जिल्ह्यातील पन्हाळा तालुक्याच्या उत्रे येथील गुंडोपंत कृष्णा हांडे यांच्या जनावराच्या गोठ्याला अचानक आग लागली.

यामध्ये चार जनावरांचा होरपळून मृत्यू झाला आहे. तर शेड जळून खाक झाले. यामध्ये सुमारे तीन लाख ७० हजारांचे नुकसान झाले आहे.

पन्हाळा तालुक्यातील उत्रे गावच्या शेजारी मठाजवळ वैरणीची साठवणूक करण्यासाठी व जनावरे बांधण्यासाठी गुंडोपंत हांडे यांनी गोठा बांधला आहे. जनावरांना वैरण घालून, डासांचा त्रास नको म्हणून धुमी घालून रात्री आठच्या सुमारास घरी गेले होते.

दरम्यान, मध्यरात्री अचानक गोठयाला आग लागल्याचे जवळपास राहणाऱ्या लोकांच्या लक्षात येताच ग्रामस्थांनी आग विझविण्याचा कसोशीने प्रयत्न केला, पण आग आटोक्याच्या बाहेर गेल्याने या आगीमध्ये एक म्हैस, एक गाय, एक रेडी, एक पाडा अशी चार जनावरे होरपळून मृत्युमुखी पडली.

प्रसंगावधान दाखवून सामाजिक कार्यकर्ते के. एम. पाटील यांनी एका म्हशीला वाचविले. तलाठी कार्यालयाकडून पंचनामा करण्यात आला. आगीमध्ये चार जनावरांचे दोन लाख ७० हजार व शेडचे एक लाख रुपये असे मिळून तीन लाख ७० हजार रुपयांचे नुकसान झाले.