फेब्रुवारी महिन्यात देशात ८९ ते १२२ टक्के म्हणजेच सरासरी इतक्या पावसाची शक्यता (Rain Forecast) हवामान विभागाने (Weather Department) वर्तविली आहे. १९७१ ते २०२० या कालावधीतील दीर्घकालीन सरासरीनुसार फेब्रुवारी महिन्यात देशात सरासरी २७.२ मिलिमीटर पाऊस पडतो.

हवामान विभागाच्या अंदाजानुसार कोकण, मध्य महाराष्ट्र, मराठवाड्यात सरासरीपेक्षा अधिक ते सरासरी इतक्या पावसाची शक्यता आहे. तर विदर्भात सरासरीपेक्षा कमी पावसाची शक्यता अधिक आहे.

पश्‍चिम मध्य प्रदेशात सरासरीपेक्षा अधिक, तर गुजरातसह दक्षिण भारतातील राज्यात सरासरी ते सरासरीपेक्षा अधिक पावसाची शक्यता आहे. प्रशांत महासागरातील ला-निना स्थिती निवळण्यास सुरुवात झाली आहे.

फेब्रुवारी अखेरपर्यंत ला-निना निवळून सर्वसामान्य स्थिती येण्याची शक्यता आहे. तर इंडियन ओशन डायपोल (आयओडी) सामान्य स्थितीत राहण्याची शक्यता आहे.