Throw Bhandara : राज्यात आरक्षणाचा मुद्द्यावरून राजकारण तापले आहे. मराठा समाज रस्त्यावर आले असताना आता धनगर आरक्षणासाठी सोलापूरात महसूलमंत्री राधाकृष्ण विखे-पाटील यांना रोषाला सामोरे जावे लागले. धनगर आरक्षण कृती समितीच्या एका कार्यकर्त्याने विखे-पाटील यांच्या अंगावर भंडारा उधळत आरक्षण देण्याची घोषणा दिल्या.

महसूलमंत्री राधाकृष्ण विखे-पाटील आज (ता. ८) सोलापूर दौऱ्यावर आहेत. सकाळी विश्रामगृहात विखे-पाटलांची भेट घेण्यासाठी धनगर आरक्षण कृती समितीचे कार्यकर्ते आले. त्यांनी धनगर समाजाच्या आरक्षणाची मागणी करणारे निवेदन दिले. हे निवेदन विखे-पाटील वाचत असताना शंकर बंगाळे याने खिशातून भंडारा काढून सरळ डोक्यावर टाकला. यावेळी त्याच्यासोबतच्या सहकाऱ्यांनी 'यळकोट-यळकोट जय मल्हार'च्या घोषणा दिल्या.

हा प्रकार घडताच राधाकृष्ण विखे-पाटील यांच्या अंगरक्षकांनी आणि समर्थकांनी तातडीने शंकर बंगाळे याला खाली पाडून लाथाबुक्कांनी मारहाण केली. यानंतर पोलिसांनी शंकर बंगाळे याला ताब्यात घेतले.