औरंगाबाद : ‘‘समाज आर्थिक दृष्ट्या समृद्ध होण्याकरिता आर्थिक साक्षरता, (Financial Literacy) आर्थिक शिस्त, आर्थिक बचत ही त्रिसूत्री महत्त्वाची आहे,’’ असे मत उद्योजक मिलिंद पोहनेरकर यांनी व्यक्त केले.

ग्रामविकास संस्थेच्या पुढाकाराने स्थापन करण्यात आलेल्या निधी बँकेच्या ग्रामविकास भवन एन -२ सिडको, औरंगाबाद येथे आयोजित कार्यक्रमात ते बोलत होते. या प्रसंगी ग्रामविकास निधी बँकेचे अध्यक्ष नरहरी शिवपुरे उपस्थित होते.

पोहनेरकर म्हणाले, ‘‘ग्रामविकास अर्बन निधी बँकेमुळे शेतकरी, महिलांच्या आर्थिक विकासाला चालना मिळाली आहे. बँकेमुळे समाजातील वंचित, अल्पभूधारक, युवक छोट्या व्यावसायिकांना आर्थिक समृद्धीची संधी उपलब्ध झाली. ग्रामविकास बँकेत ही शिस्त पाळल्यामुळे वसुली शंभर टक्के आहे.’’ बँकेचे अध्यक्ष नरहरी शिवपुरे यांनी प्रास्ताविक केले.

या वर्षी बँकेतर्फे ५०० कुटुंबांना अर्थसाहाय्य करण्यात आले. ग्रामविकास निधी बँकेतर्फे आर्थिक मदत घेऊन प्रगती केलेल्या शेतकरी महिला, युवकांनी मनोगत व्यक्त केले. बापूराव भोसले, विठ्ठल झिने, चंद्रकांत चव्हाण, भगवान कुबेर, संतोष पाटील, अप्पासाहेब हुलसार, चित्तेनदी खोऱ्यातील शेतकरी, बचत गटाच्या महिला, छोटे व्यावसायिक उपस्थित होते. सूत्रसंचालन बालाजी बिरादार यांनी केले.