कोल्हापूर ः शेती उत्पन्न बाजार समितीचा निवडणूक (Kolhapur APMC Election) कार्यक्रम न्यायालयाच्या आदेशाच्या आधिन राहूनच राबवला जाणार आहे. त्याचाच भाग म्हणून बाजार समितीच्या मतदारांची अंतिम यादी (APMC Voter List) निवडणूक प्राधिकरणाने जाहीर केली. यात बाजार समितीसाठी २१ हजार ९०५ मतदारांचा समावेश आहे. पुढील निवडणूक नियोजनानुसार २३ ते २९ डिसेंबर या कालावधीत उमेदवारी अर्ज भरले जातील.

ग्रामपंचायतीचे विद्यमान सदस्य बाजार समिती निवडणुकीसाठी मतदार आहेत. त्याची कच्ची यादी बाजार समितीने सहकार निवडणूक प्राधिकरणाकडे दिली होती. त्यावर हरकती आल्या, सुनावणी झाली. त्यानंतर अंतिम यादी जाहीर झाली. अशात जिल्ह्यातील ६०५ ग्रामपंचायतींच्या निवडणुका जाहीर झाल्या.

३०३ ग्रामपंचायतींतील सदस्य कोल्हापूर बाजार समितीसाठी मतदार आहेत. त्या ग्रामपंचायतींच्या निवडणुका झाल्यानंतर नवीन सदस्यांचा बाजार समितीच्या मतदारयादीत समावेश करावा. तोपर्यंत बाजार समिती निवडणुका स्थगित कराव्यात, अशी मागणी करणारी याचिका माजी संचालक ॲड. किरण पाटील व नाथाजी पाटील यांनी दाखल केली आहे.

त्यावरील सुनावणी प्रलंबित आहे; मात्र सहकार निवडणूक प्राधिकारणाने यापूर्वी नियोजित निवडणूक कार्यक्रमानुसार अंतिम यादी जाहीर झाली. बाजार समितीच्या निवडणुकांपूर्वी ग्रामपंचायत निवडणुका होणार आहेत. या निवडणुकीत निवडून येणाऱ्या सदस्यांची नावे बाजार समितीच्या मतदारयादीत समाविष्ट होणार की नाही याचा पेच मात्र कायम आहे.