तळोदा, जि. नंदुरबार : परतीचा पावसामुळे आधीच संकटात सापडलेल्या शेतकऱ्यांना कापूस चोरीच्या (Cotton Theft) घटनांमुळे दुहेरी आर्थिक फटका (Financial Loss To Farmer) बसत आहे. येथील खर्डी नदी परिसरातील शेतांमधून कापूस चोरीच्या घटनांमध्ये वाढ झाल्याने शेतकऱ्यांमधून चिंता व्यक्त करण्यात येत आहे.

पोलिसांनी चोरट्यांचा तातडीने बंदोबस्त करीत चोरीचा कापूस घेणाऱ्या व्यापाऱ्यांवर देखील कडक कारवाई करावी, अशी मागणी शेतकऱ्यांमधून करण्यात येत आहे.

सध्या सर्वत्र कापूस वेचणीचा हंगाम सुरू झाला आहे. मात्र त्याचबरोबर कापूस चोरटे देखील सक्रिय झाले आहेत. खर्डी नदीला लागून असलेल्या शेतातील अनेक शेतकऱ्यांचा कापूस चोरीला गेल्याचे सांगितले जात आहे.

दहा दिवसांपूर्वी एका शेतकऱ्यांचा जवळपास तीन क्विंटल कापूस चोरीला गेला तर सात दिवसांपूर्वी त्याच परिसरातील एका शेतकऱ्याचा तब्बल दहा क्विंटल कापूस तर एका शेतकऱ्याचा कापूस चोरट्यांनी चोरून नेल्याचे शेतकऱ्यांनी सांगितले आहे.