Latest Agriculture News : महिनाभर पावसाने दडी मारल्याने शेतीला पूरक वेळेत पाणी मिळेल की नाही, या भीतीने शेतकरी धास्तावलेले होते. परंतु, गोकुळाष्टमीपासून जिल्ह्यात पावसाच्या दमदार आगमनाने शेतकरी राजा सुखावला आहे. अशातच ऑगस्ट महिना कोरडा गेला असल्याने भात वाढीवर त्याचा मोठा परिणाम झाला आहे. मात्र, पुन्हा पावसाचे आगमन झाले असल्याने भातशेतीला उभारी मिळणार आहे.

महिनाभर पावसाने ओढ दिल्याने भातशेती संकटात आली होती. भाताच्या वाढीवर पाऊस नसल्याने परिणाम होणार असल्याची चिन्हे असल्याने वर्षभरापासून केलेली मेहनत वाया जाणार असल्याची भीती शेतकऱ्यांना सतावत होती. पावसाने ओढ दिल्याने पुन्हा नव्या संकटाला सामोरे जाण्याच्या काळजीत असलेल्या शेतकऱ्यावर वरुणराजाने कृपादृष्टी दाखवत दमदार हजेरी लावली आहे.

गेल्या दोन दिवसांपासून जिल्ह्याभर पावसाने हजेरी लावल्याने पिके पुन्हा तरतरीत झाली आहेत. तसेच मघा नक्षत्र बुधवारी संपत असून गुरुवारी पिठोरी अमावस्येला उत्तरा नक्षत्र निघत आहे.

या नक्षत्रात पाऊस हत्ती वाहनावर असल्याने दमदार लागेल, असा अंदाज शेतकऱ्यांकडून वर्तवला जात आहे. त्यामुळे भातशेती पुन्हा तेजदार झाल्याने जिल्ह्यात आनंदाचे वातावरण आहे.