अॅग्रोवन वृत्तसेवा
जळगाव ः राज्यातून केळीची निर्यात (Banana Export) वाढू लागली आहे. सध्या राज्यातून रोज २० ते २२ कंटेनर (एक कंटेनर २० टन क्षमता) केळीची निर्यात परदेशात सुरू आहे. त्यात खानदेशातून सध्या पाच कंटेनर केळी परदेशात पाठविली जात आहे.

केळीच्या निर्यातीस पुढे आणखी गती येईल. कारण आंध्र प्रदेशात निर्यातक्षम केळी कमी झाली आहे. आंध्र प्रदेशात कार्यरत निर्यातदार कंपन्या महाराष्ट्रात दाखल झाल्या आहेत.

सोलापुरातून पुढील आठ ते १० दिवसांत निर्यात आणखी वाढेल. सध्या नंदुरबारमधील शहादामधून निर्यात सुरू आहे. जळगावमधील रावेरातून पुढील आठ दिवसांत निर्यात वाढेल.

शहादा भागातून रोज तीन कंटेनरची पाठवणूक सुरू आहे. तर जळगाव व धुळ्यातून चार कंटेनर केळी उपलब्ध होत आहे. धुळ्यातील शिरपुरातून रोज दोन कंटेनर केळीची परदेशात पाठवणूक होत आहे. तर जळगाव जिल्ह्यात चोपडा, यावल भागात निर्यातक्षम केळी उपलब्ध होत आहे.

खानदेशात मागील महिन्यात प्रतिदिन तीन कंटेनर केळीची पाठवणूक परदेशात सुरू होती. या महिन्यात प्रतिदिन सरासरी पाच कंटेनर केळीची पाठवणूक झाली आहे.

या महिन्याच्या पहिल्या पंधरवड्यात खानदेशात प्रतिदिन तीन कंटेनर एवढीच केळी परदेशात पाठवणुकीसाठी उपलब्ध होत होती. परंतु निर्यातक्षम केळीची उपलब्धता मागील १० ते १२ दिवसांत वाढली आहे.

जळगावात शीतगृहाचा अभाव
मागील वर्षीदेखील मार्चमध्ये खानदेशातून निर्यात कमी होती. खानदेशात शीतगृहाची सुविधा नाही. तसेच भाडेदर सोलापूरच्या तुलनेत जळगावातून मुंबईत वाहतुकीसंबंधी एका कंटेनरसाठी ४० हजार रुपये अधिक पडतात.

यामुळे निर्यातदारांचा प्राधान्यक्रम सोलापुरला अधिक आहे. १० शीतगृह सोलापुरात आहेत. एका शीतगृहात ५० कंटेनर केळीची साठवणूक करणे शक्य आहे. यामुळे तेथून निर्यात वाढत आहे.

निर्यातक्षम दर्जेदार केळी खानदेशात उपलब्ध झाली आहे. पुढे जळगाव जिल्ह्यातून निर्यात वाढेल. त्यासाठी निर्यातदार कंपन्या दाखल होत आहेत. सध्या खानदेशातून रोज सात कंटेनर केळीची पाठवणूक सुरू आहे.

- प्रेमानंद महाजन, केळी व्यापाराचे जाणकार, जळगाव