टाकळी हाजी, जि. पुणे : शिरूर शहरासह तालुक्यात घरगुती वापर असणाऱ्या ग्राहकांना रीडिंग (Electricity Reading) न घेता एका महिन्याकाठी एका ग्राहकाला तब्बल एक लाख रुपये बिल (Electricity Bill) आकारले असल्याचे जांबुत येथील विद्युत ग्राहक विकास गाजरे यांनी सांगितले आहे.

महावितरण विभाग ग्राहकांची मोठ्या प्रमाणावर लूट करत असून, मीटर रीडिंग घेणाऱ्या एजन्सीवर कडक कारवाई करण्याची मागणी शिरूर तालुक्यातील जनतेकडून होत आहे. चांडोह, वडनेर, जांबुत सविंदणे, कवठे येमाई, टाकळी हाजी, मलठण, आमदाबाद व शिरूर शहरात रीडिंग न घेतल्यामुळे चुकीचे रीडिंग येत आहे.

प्रत्यक्ष रीडिंग वेगळे आणि बिलांवर वेगळे या कारणामुळे ग्राहकाला विनाकारण बिल जास्त भरावं लागत आहे. मीटरचे रीडिंग फोटो हा मोबाईल मध्ये काढत असल्यामुळे मीटरचा फोटो त्यामध्ये अचूक येत नसल्यामुळे रीडिंग चुकीचे टाकत आहे. या चुकीच्या पद्धतीने रीडिंगची तफावत होत असल्यामुळे विनाकारण जादा बिल भरण्याचा त्रास ग्राहकांना होत आहे.