शिवसेना खासदार संजय राऊत (Sanjay Raut) यांच्या घरी सकाळीच ईडीचे (ED) पथक दाखल झाले आहे. पत्राचाळ प्रकरणात सध्या राऊतांची त्यांच्या भांडूपमधल्या 'मैत्री' या घरी चौकशी सुरू आहे. सध्या संजय राऊत, त्यांच्या पत्नी वर्षा आणि बंधू सुनील यांची चौकशी सुरू आहे. दरम्यान,त्यांच्या घराबाहेर मोठ्या प्रमाणावर शिवसैनिक जमले असून जोरदार घोषणाबाजी सुरू आहे.

संजय राऊत (Sanjay Raut) यांच्या घराबाहेरच्या बंदोबस्तात वाढ करण्यात आली आहे. तसेच ईडी कार्यालयाबाहेरचा बंदोबस्तही वाढवला आहे. त्यामुळे आता संजय राऊत यांच्या अटकेची तयारी ईडीकडून करण्यात येत असल्याची शक्यता वर्तवण्यात येत आहेत. दरम्यान संजय राऊत यांचे वकील त्यांच्या घरी दाखल झाले आहेत.

संजय राऊतांच्या (Sanjay Raut) घरासह इतर दोन ठिकाणी ईडीची शोधमोहीम सुरू आहे. ईडीच्या (ED) एकूण तीन पथकांसह जवळपास २५ अधिकारी तपास करत आहेत. दरम्यान सकाळी संजय राऊत यांनी याबाबतचे ट्विट केले.

कितीही कारवाया केल्या तरी शिवसेना सोडणार नाही.महाराष्ट्र आणि शिवसेना लढत राहील. खोटी कारवाई.. खोटे पुरावे मी शिवसेना सोडणार नाही. मरेन पण शरण जाणार नाही. कोणत्याही घोटाळ्याशी माझा काडीमात्र संबंध नाही. शिवसेना प्रमुख बाळासाहेब ठाकरे यांची शपथ घेऊन मी हे सांगत आहे..बाळासाहेबांनी आम्हाला लढायला शिकवलंय. मी शिवसेनेसाठी लढत राहील. जय महाराष्ट्र, असं ट्वीट ईडीची चौकशी सुरू असतानाच संजय राऊत यांनी केले आहे.