नगर ः महात्मा फुले कृषी विद्यापीठात (MPKV) १८ जणांना दिवाळीची भेट (Diwali Gift) मिळाली आहे. कुलगुरू डॉ. पी. जी. पाटील यांच्या पुढाकाराने मयत कर्मचाऱ्यांच्या कायदेशीर वारसास अनुकंपा तत्त्वावरील नियुक्त्यांचे आदेश (Employment) नुकतेच दिले आहेत. १८ जणांना विद्यापीठ सेवेत सामावून घेण्यात आले आहे.

महात्मा फुले कृषी विद्यापीठातील मयत कर्मचाऱ्यांच्या वारसांना अनुकंपा तत्त्वावर नोकरीत समावून घेण्याची मागणी होती. त्यानुसार कुलगुरू डॉ. पाटील यांच्या पुढाकारातून विद्यापीठ प्रशासनाने मयत कर्मचाऱ्यांच्या कायदेशीर वारसास अनुकंपा तत्त्वावरील नियुक्त्यांचे आदेश दिले.

नोकरीत सामावून घेतलेल्यांमध्ये लिपिक, प्रयोगशाळा परिचर, मजूर व शिपाई या प्रवर्गांचा समावेश आहे. शासकीय नियमानुसार एखादा कर्मचारी कर्तव्यावर असताना मयत झाला, तर त्याच्या कायदेशीर वारसास अनुकंपा तत्त्वावर नोकरी देण्याचा नियम आहे. त्यानुसारच संबंधित कर्मचाऱ्यांच्या वारसास नियुक्ती दिल्याची माहिती विद्यापीठाचे कुलसचिव प्रमोद लहाळे यांनी दिली.

ऐन दिवाळीच्या दिवसांमध्ये या नियुक्तीचे आदेश दिल्यामुळे कुटुंबांमध्ये दिवाळीच्या सणाचा आनंद द्विगुणित झाला असल्याचे मत नियुक्ती मिळालेल्या कर्मचाऱ्यांनी व्यक्त केले.