कोल्हापूर : जिल्ह्यात अपवाद वगळता बहुतांश ठिकाणी पावसाने (Rain Update Kolhapur) विश्रांती घेतल्याचे चित्र आहे. शुक्रवारी (ता. २१) दुपारपर्यंत सर्वत्र ऊन व ढगाळ हवामान (Cloudy weather) होते. पावसाने विश्रांती घेतल्याने शेतकऱ्यांनी सुटकेचा निश्वास टाकला आहे; मात्र खरीप पिकांची अवस्था (Crop Condition) अजूनही दयनीयच असून पूर्ण पाऊस थांबल्यानंतरच खरीप पिकांच्या नुकसानीचे (Crop Damage) चित्र स्पष्ट होणार आहे.

सध्या पाऊस थांबला असला तरी अनेक शिवारांमध्ये पाणी तसेच साचून आहे. यामुळे याच पाण्यातून भुईमुगासारखी पिके काढण्यासाठी शेतकरी धडपडत असल्याचे चित्र शिवारांमध्ये आहे. गुरुवारी (ता. २०) जिल्ह्याच्या पश्चिम भागातील काही गावांमध्ये हलका ते मध्यम स्वरूपाच्या पाऊस झाला.

या व्यतिरिक्त अन्य ठिकाणी मात्र पाऊस थाबल्याचे चित्र होते. पावसाने विश्रांती घेतली तरी यंदाचा गळीत हंगाम मात्र दिवाळीनंतरच सुरू होण्याची शक्यता कारखाना सूत्रांनी व्यक्त केली.