ॲग्रोवन वृत्तसेवा
Cashew News : मुंबई : कोकणासह कोल्हापूर जिल्ह्यातील आजरा आणि चंदगड या दोन तालुक्यांसाठी लागू करण्यात आलेल्या काजू फळपीक विकास योजनेंतर्गत (Cashew Fruit Crop Development Scheme) आजरा किंवा चंदगड या तालुक्यांत विभागीय कार्यालय सुरू करण्यात येणार आहे.

राज्य सरकारने काढलेल्या शासन निर्णयात रत्नागिरी आणि सिंधूदुर्ग या दोन ठिकाणी विभागीय कार्यालये सुरू करण्यात येणार होती. ही दोन ठिकाणे आणि चंदगड व आजरा या दोन तालुक्यांतील अंतर शेकडो किलोमीटरचे असल्याने काजू उत्पादक, उद्योजकांसाठी ते गैरसोयीचे होते.

त्यामुळे या दोन तालुक्यांपैकी एका ठिकाणी विभागीय कार्यालय सुरू करावे, अशी मागणी करण्यात येत होती. त्यानुसार पणन विभागाने मुख्यमंत्री एकनाथ शिंदे यांच्याकडे प्रस्ताव पाठविला आहे. त्यास लवकरच मंजुरी मिळेल, अशी माहिती, सहकार व पणन विभागाचे अपर मुख्य सचिव अनुपकुमार यांनी दिली.

कोकणासह आजरा आणि चंदगड या तालुक्यांत काजूचा ब्रँड तयार करून त्याची प्रसिद्धी व जाहिरात करण्यासह काजू पिकास मिळालेल्या जी. आय. मानांकनाचा विस्तार करून मंडळाची वेबसाइट तयार करण्यात येईल.

काजू प्रक्रिया उद्योजकांसाठी प्रशिक्षण व प्रात्यक्षिक वर्गांचे हे मंडळ आयोजन करेल. कोल्हापूर जिल्ह्यात विभागीय कार्यालय झाल्यास उद्योजकांसह उत्पादकांना मोठा फायदा होईल.

भुदरगड, राधानगरीचा समावेश हवा
आजरा, चंदगड, भुदरगड आणि राधानगरीचा पश्चिमेकडील भाग हा कोकणाला लागून आहे. या ठिकाणी काजू, आंबा, फणस आणि अन्य कोकणातील फळपिके मोठ्या प्रमाणात येतात.

सध्या काजू मंडळात कोल्हापूर जिल्ह्यातील आजरा आणि चंदगड या दोनच तालुक्यांचा समावेश केला आहे. मात्र, भुदरगड आणि राधानगरी तालुक्यातील काजू उत्पादकांसाठी या मंडळाचा लाभ झाला पाहिजे. त्यामुळे या दोन तालुक्यांचा समावेशदेखील करण्याची गरज आहे.